Hoxe publícase no DOG a RESOLUCIÓN do 5 de abril de 2019 pola que se publican a orde de prelación e a puntuación definitiva obtidas polas persoas aspirantes admitidas no proceso de actualización das listas de selección temporal de diversas categorías de persoal estatutario.

• técnico/a superior en anatomía patolóxica e citoloxía,
• técnico/a superior en dietética e nutrición,
• técnico/a superior en documentación sanitaria,
• técnico/a superior en hixiene bucodental,
• técnico/a superior en imaxe para o diagnóstico,
• técnico/a superior en laboratorio de diagnóstico clínico,
• técnico/a superior en radioterapia,
• técnico/a en coidados auxiliares de enfermaría
• técnico/a en farmacia.

As listas entrarán en vigor ao día seguinte da publicación no DOG.

Considera que "fixeron saltar polos aires" o acordo asinado o pasado 10 de abril.

Compostela, 11 de abril de 2019.-

O pasado luns asinábase o acordo de negociación de todos os temas que se viñan denunciando, desde hai anos, referidos o deterioro de Atención Primaria. Un acordo polo que o SERGAS se comprometía, a través da Directora de Recursos Humanos -designada por eles-, a negociar en dúas mesas as demandas presentadas polo comité de folga. "Transcorridas menos de 24 horas xa fixeron saltar todo polos aires", denuncia a secretaria nacional de CIG-Saúde, María Xosé Abuín.

Abuín explica que tan só un día despois da sinatura deste acordo desde o Presidente da Xunta, até o Xerente do SERGAS, pasando polo portavoz de Sanidade no Parlamento e mesmo o propio conselleiro de Sanidade, en comparecencia parlamentaria, retiraron publicamente o apoio ao acordo asinado no ámbito de negociación. "O PP non só desautoriza así á Directora de Recursos Humanos, senón que constata a súa indecencia política e o escaso, por non dicir nulo valor dos seus compromisos, que xa non se sustentan sequera en campaña electoral", denuncia a secretaria nacional de CIG-Saúde.

María Xosé Abuín lembra as manifestacións públicas de uns e outros e denuncia que mesmo chegaran a cualificar a plataforma de Primaria como un "chiringuito"; que manifestaran que xa tiñan asinado todo cos Colexios Profesionais e outros colectivos; que o conselleiro chegara a afirmar que o modelo de Primaria do PP xa era un modelo de éxito que non precisaba máis orzamento e que só ía dedicar 17,3 millóns de euros en dous anos; que a solución pasaba por facer campañas de información á cidadanía e por aumentar máis tecnoloxía na Atención Primaria. "Isto quere dicir, nin máis nin menos, que o que pretenden é ampliar o negocio, que agora está nos hospitais, tamén á primaria, e que o único que farán, en todo caso, será redefinir algúns temas".

A secretaria Nacional de CIG-Saúde considera "inadmisible" que xa antes de iniciarse a negociación do estudo de necesidades de persoal na atención primaria, que é un dos compromiso recollidos na acta, xa o conselleiro adiante en sede parlamentaria que non teñen a máis mínima intención de dotar o servizo de máis medios humanos, nin materiais, nin máis orzamento. Nin sequera de dotar á Primaria de capacidade resolutiva ou a creación dunha Xerencia. "Antes de cuantificar as necesidades reais xa anuncian o ridículo orzamento que van investir, o que é a proba máis evidente de que a súa intención era e é non facer nada", denuncia Abuín.

Desde a CIG-Saúde "lamentamos o erro cometido ao confiar en que a consellaría de Sanidade e Feijóo ían cumprir o que a Directora de Recursos Humanos, que adoita respectar os compromisos que adquire e que dela dependen, nos estaba a transmitir. Estaba sendo utilizada e eles non tiveron sequera a decencia de asistir a ningunha reunión coa Plataforma".

A CIG-Saúde lamenta, xa que logo, ter desconvocado a folga e terlle dado ese voto de confianza ao goberno do PP, que "sabemos que non é digno de tal", afirma Abuín, quen anuncia que "imos convocar unha reunión da plataforma en breve para propor retomar a folga no mes de maio se o día 26 o SERGAS non trae á mesa sectorial as propostas para desenvolver os acordos acadados o 10 de abril. Estamos dispostas a incrementar a mobilización a todos os niveis".

O SERGAS recoñece a necesidade de crear un marco de negociación para a Atención Primaria.

Compostela, 8 de abril de 2019.- 

As organizacións sindicais convocantes da folga prevista para a Atención Primaria os días 9, 10 e 11 de abril acordaron desconvocala, xunto coas mobilizacións, logo de que se chegara a un acordo na reunión mantida este mesmo luns co SERGAS. Para a CIG-Saúde, deste xeito "o SERGAS recoñece por fin a necesidade de crear un marco de negociación para dar solución á problemática de Atención Primaria".

O acordo contempla:
1. A apertura na mesa sectorial de sanidade dun diálogo sobre atención primaria cara a negociación de todas as reivindicación de contido laboral incluídas na convocatoria de folga presentada, significativamente a dotación de prazas.
2. En relación coas cuestións de carácter asistencial ou organizativas incluídas nas citadas reivindicacións, as mesmas serán canalizadas a través do Consello Técnico de Atención Primaria, órgano colexiado no que estarán representadas, entre outros colectivos, as sociedades científicas, asociación profesionais e sindicatos.
O dito órgano será creado por orde da Consellaría de Sanidade, cuxo borrador foi entregado ás distintas organizacións sindicais convocantes para a formulación de alegacións e xa lle foron incluídas algunhas modificacións.
3. Compromiso das partes de acadar unha solución inmediata ao conflito existente no ámbito dos Puntos de Atención Continuada.
4. Compromiso de mellora do modelo de nomeamento estatutario eventual de continuidade acordado na Mesa Sectorial.
5. As medidas previstas neste acordo irán acompañadas dun incremento orzamentario do programa de gasto de atención primaria á saúde, en función das dispoñibilidades orzamentarias.
6. Durante o mes de abril será convocada a Mesa Sectorial para a análise dos aspectos referidos, así como para a análise das alegacións ao borrador da orde de creación do Consello Técnico de Atención Primaria, que se constituirá na primeira quincena de maio co obxecto de aprobar o seu regulamento de funcionamento interno.

Tal e como se acordou ao remate da xuntanza, esa primeira mesa sectorial, será convocada para o día 26 de abril.
A secretaria nacional de CIG-Saúde, María Xosé Abuín valora que este acordo pon de manifesto o recoñecemento por parte da consellaría de Sanidade da necesidade de crear este órgano de participación para analizar e pór solución ás necesidades da Atención Primaria. "Agardamos que haxa boa fe por parte da consellaría de Sanidade e que as conclusións deste Consello Técnico sexa cumpridas na súa totalidade e co correspondente orzamento para darlles cumprimento".
Máis unha vez, a CIG-Saúde lamenta que sexa necesario recorrer a medidas de presión como a convocatoria dunha folga para que o SERGAS acepte crear un marco de negociación para solucionar os problema de Atención Primaria.
En todo caso a CIG-Saúde advirte que se esa "boa fe" non se traduce en feitos "retomaremos as medidas de presión sen descartar ningunha".

Hoxe publícase no DOG a RESOLUCIÓN do 1 de abril de 2019 pola que se modifica a Resolución do 1 de marzo de 2019 pola que se convoca concurso-oposición para o ingreso na categoría de persoal de servizos xerais, ampliando o número de prazas convocadas.

O nº de prazas que se inclúen na convocatoria  de OPE na categoría de PSX, son as que seguen:

Hoxe publicouse no DOG a RESOLUCIÓN do 25 de marzo de 2019, da Dirección Xeral de Recursos Humanos, pola que se resolve o concurso específico para o ingreso na categoría estatutaria de persoal enfermeiro especialista nas especialidades de traballo e de saúde mental.

As/os aspirantes que figuran no Anexo da Resolución publicada, serán nomeadas/os como persoal estatutario fixo do Servizo Galego de Saúde na categoría de persoal enfermeiro especialista e na especialidade que nel se indica, adxudicándolle a praza correspondente.