CIG-Saúde gaña as eleccións sindicais na Fundación Biomédica Galicia Sur

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

CIGSAUDElogo

Hoxe, mércores 25 de abril de 2018 celébraronse as primeiras eleccións sindicais na Fundación Biomédica Galicia Sur promovidas por CIG-Saúde.

Nestas eleccións están incluidas as áreas de Ourense, Pontevedra e Vigo.

Obtivemos máis do 63% dos votos das traballadoras. Houbo unha alta participación, o que dí moito sobre a necesidade destas eleccións.

Como consecuencia a CIG-Saúde ten 3 das 5 delegadas elixidas.

O pasado 20 de abril, nas eleccións da Fundación de Santiago de compostela a CIG-Saúde tivo 7 de 9 delegadas.

As Fundacións de Investigación Sanitaria dos hospitais xurdiron para axudar a xestionar, organizar e promover a investigación realizada desde o entorno hospitalario. Non teñen o percorrido nin a tradición doutros centros que contribúen á tarefa investigadora, como as universidades, ou que constitúen a esencia mesma do seu ser, como o Consello Superior de Investigacións Científicas.

Porén, debido ao interese e ao traballo de múltiples actores (principalmente as persoas que traballan nelas), crecen de ano en ano e reclaman un papel e unha importancia no ámbito investigador que aínda se lles nega. Entendemos que estas fundacións teñen e deben dar moito máis de si en Galicia, para ofrecer e rendibilizar todo o potencial que atesouran. Non é un camiño que deban percorrer soas, pero é verdade que a súa identidade debe definirse tamén desde dentro mesmo do seu ser.

IMG 20180410 144607 Vigo

A nosa candidatura defende que o capital máis prezado de calquera organización é o humano, e no caso da investigación este valor acrecéntase. É por iso que nos comprometemos a traballar por configurar un marco laboral definido e uniforme, flexible pero seguro, que determine claramente os deberes do seu persoal, pero que tamén permita e promova a súa carreira profesional; un entorno que asegure a dignidade da investigación biomédica en todas as súas facetas, desde as máis experimentais e próximas aos doentes, até as máis innovadoras e transformadoras, pasando polas de xestión e promoción.

Non buscamos unha serie de medidas puntuais que melloren as condicións laborais. Imos máis alá porque buscamos unha estratexia global, elaborada entre todos os axentes implicados, que defina as categorías profesionais, a promoción dentro delas e a conexión co seu entorno hospitalario, universitario e social, a fin de que a investigación sanitaria asegure o longo percorrido que necesita. É por iso que queremos representar a todo o persoal traballador e dialogar con todas as partes, para, entre todos, chegar a un resultado do que todos poidamos sentirnos orgullosos.

 

Manuel González Moreira

Secretario Comarcal de CIG-Saúde Vigo

Inicio de folga indefinida no Hospital de Monforte

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

cig informa

No día de hoxe, o persoal do Hospital Comarcal de Monforte comeza unha folga indefinida que se fará efectiva os martes e xoves de cada semana.

Teñen máis motivos ca nunca para facerse escoitar, tanto pola defensa dos seus dereitos laborais, como pola defensa da Sanidade Pública para unha atención de calidade aos seus usuarios/as.

IMG-20180424-WA0016

No decálogo de motivos para levar adiante esta folga recóllense as cuestións máis candentes, pero aínda quedan máis:

  • Pola aprobación no parlamento da nova lei de saúde, que deixa a área de Monforte como distrito sanitario
  • Pola supresión de prazas dalgunha categoría
  • Pola nula capacidade de negociación da Directora de Enfermaría, polo que se solicita o seu cese
  • Pola falta de persoal no hospital dende hai máis de 10 anos en tódalas categorías
  • Polo peche de plantas
  • Polas derivacións de probas e tratamentos á sanidade privada
  • Polas longas listas de espera
  • Pola modificación unilateral de carteleiras de traballo
  • Pola mobilización do persoal por todas as unidades para evitar contratar
  • Pola falta de cobertura das ausencias do persoal do centro
  • Pola presión asistencial que está a sufrir o persoal
  • Polos problemas provocados pola dirección do centro á hora de conceder permisos

Non podemos facer outra cousa que enviar o apoio da CIG ás compañeiras/os de Monforte, agradecerlles o exemplo que dan na loita dos intereses da poboación e dos seus propios.

Por outra banda manifestar a satisfacción da CIG polo seguimento da folga, a pesares dos abusivos servizos mínimos (xa denunciados). As/os compañeiras/os foron quen de parar a actividade cirúrxica (excepto as prioridades 1), o servizo de Radioloxía, varias consultas e a ralentización doutras unidades como o laboratorio....

Esperemos que dende a cúpula da EOXI baixen á terra e atendan ao clamor dun persoal que leva anos sufrindo penosas condicións e que agora están dispostas a facerse oír.

CIG-Saúde obtivo maioría absoluta nas eleccións sindicais do Instituto de Investigación Sanitaria de Santiago

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

Hospital Clinico 002

Logrou sete dos nove delegados/as que integran o comité de empresa

A CIG-Saúde obtivo a maioría absoluta nas eleccións sindicais celebradas este venres no Instituto de Investigación sanitaria conseguindo 7 delegados/as fronte aos 2 que obtivo a UGT. A central sindical pretende, entre outras cuestións, crear un marco normativo, na forma de convenio laboral específico, que permita “dignificar o traballo que se leva a cabo no día a día nas tres grandes Fundación Sanitarias de Galiza”.

As Fundacións de Investigación Sanitaria dos Hospitais xurdiron para axudar a xestionar, organizar e promover a  investigación realizada desde o entorno hospitalario. Non teñen o percorrido nin a tradición doutros centros que contribúen á tarefa investigadora, como as universidades ou que constitúen a  esencia mesma do seu ser, como o Consello Superior de Investigacións Científicas.

Porén, debido ao interese e ao traballo de múltiples actores –principalmente as persoas que traballan nelas- crecen de ano a ano e reclaman un papel e unha importancia no ámbito investigador que aínda se lles nega.

A CIG entende que estas fundacións deben dar moito máis de si en Galiza, para ofrecer e rendibilizar todo o potencial que atesouran. Defende que o capital máis prezado é o humano, un valor que no caso da investigación se acrecenta. Por iso entende que é imprescindíbel configurar un marco laboral definido e uniforme, flexible, pero seguro, que determine claramente os deberes do seu persoal, mais tamén que permita e promova a súa carreira profesional; un entorno que asegure a dignidade da investigación biomédica en todas as súas facetas, desde as máis experimentais e próximas ás/aos doentes, até as máis innovadoras e transformadoras, pasando polas de xestión e promoción.

Contratación e selección do persoal

Por iso a CIG-Saúde defende o establecemento de categorías profesionais para todos e cada un dos perfís actuais, tanto para o persoal investigador como para o de xestión e que se definan os procedementos de acceso aos distintos postos de traballo, na procura dun sistema de selección e contratación igualitario e transparente.

Estabilización

Xunto a isto aposta por negociar os procedementos adecuados para conseguir a correcta estabilización laboral do persoal das Fundacións e traballará na procura do recoñecemento da antigüidade laboral coa implantación do sistema de trienios ademais de defender a  acreditación da experiencia laboral adquirida nas fundacións, para oposicións/promocións do sistema público de saúde.

Sistema retributivo

Respecto do sistema retributivo a CIG loitará por que se recolla cada especialidade dos distintos postos de traballo e que permita a equiparación salarial co SERGAS; pola creación de táboas salariais acordes cos postos de traballo existentes e por que se negocie unha carreira profesional que recoñeza e retribúa a traxectoria profesional e o compromiso coa organización.

Ademais negociará a correcta regulación de permisos e licencias tomando como referencia as normativas afíns do nos territorio e definirá de maneira máis clara a xornada laboral, o cómputo de horas laborais ou as distintas quendas de traballo.

Non á carreira que consolida a discriminación salarial no Sergas

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

Encabezado carreira

No último trimestre do ano 2017 as Organizacións Sindicais da Mesa Sectorial acordamos constituír unha plataforma sindical para demandar do SERGAS o cumprimento dos acordos asinados na mesa sectorial e suspendidos desde o ano 2010:

Ü  Acordo retributivo 2008/2012. Que contempla unha suba salarial para todas as categorías, e un incremento da atención continuada: noites, festivos, gardas…

Ü  Carreira profesional.

Ü  Acordo retributivo de PACs.

Como medidas de presión, e ante a negativa do SERGAS a negociar nada, as Organizacións Sindicais da Mesa Sectorial acordamos facer FOLGA os días 2 e 3 de novembro. Uns días antes á devandita convocatoria e coa intención de desmobilizar, o SERGAS convoca unha reunión na que oferta falar só de carreira profesional.

E como chantaxe, ofrece a sinatura dunha acta que simplemente era un cheque en branco para a Administración. Acta que CIG-Saúde non asinou, e mantivo a convocatoria de folga.

E agora o SERGAS, con este cheque en branco, mantén unha postura de forza na Mesa Sectorial que impide a negociación da carreira profesional, mantendo unha postura intransixente, e non acepta negociar ningunha das propostas que presenta a CIG-SAÚDE.

Que carreira se está a negociar na mesa sectorial? “A CARREIRA DA DISCRIMINACIÓN”

  • Unha carreira que non recoñece a antigüidade das/os profesionais. Impide acceder ao grao que te corresponde en función da túa antigüidade.
  • Unha carreira que deixa fóra a todo o persoal temporal: interinas/os, contratadas/os de longa duración…
  • Unha carreira que non permite acceder ao grao que lle corresponde ao persoal de promoción interna, polo simple feito de ter aprobada máis dunha OPE no SERGAS.
  • Unha carreira negociada no contexto da taxa de reposición, taxa pactada cos sindicatos estatais e co voto en contra da CIG, que impide a consolidación do persoal como persoal fixo.
    • Desde o ano 2008 non se convocaron prazas das categorías dos Grupos C1 e E, e estes/as interinos/as agora quedan fóra do Réxime transitorio e excepcional de encadramento: persoal de hostalaría, mantemento…
    • Tampouco entrarán as categorías que xa teñen OPE en curso ou que aínda non tomaron posesión: FEAs, Traballador/a social, TCAES, PSX, celadoras/es, auxiliar Administrativo…
    • Estes colectivos van ser dobremente penalizados. Son os colectivos que teñen suspendidos o IV grao de carreira e, agora, son os colectivos que maioritariamente quedarán fóra do Réxime transitorio e excepcional de encadramento da carreira profesional.

CIG-SAÚDE non acepta esta carreira profesional!

As Organizacións Sindicais non podemos aceptar unha carreira profesional que incrementa a discriminación salarial e, que ten os mesmos efectos que a crise: castiga aos colectivos con menor retribución e con maior precariedade laboral no SERGAS.

Concentración todos os xoves de abril pola carreira profesional

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

carreira profesional cig

O pasado xoves 5 de abril iniciouse, cunhas primeiras concentracións, o intenso calendario de mobilizacións que CIG-Saúde realizará durante o proceso de negociación do acordo de Carreira Profesional, todos os xoves do mes de abril; como continuación do traballo de información sobre a Carreira, de difusión dos consecutivos borradores entregados polo SERGAS coa súa inaceptable proposta e en defensa da aplicación da xustiza no modelo de Carreira Profesional.

O venres 6 de abril o SERGAS fixo entrega do 4º borrador parcial. Este borrador inclúe unha importante rectificación con respecto á exixencia de 3 anos como persoal fixo no SERGAS, que figuraba no anterior borrador e que penalizaba sen acceso ao réxime de encadre na carreira profesional a todo o persoal das categorías de Médica/o de Familia, Enfermeira/o que tomaron posesión en marzo de 2017 e de Matrona/ón, Logopedia, Fisioterapia, Terapia ocupacional, TCAEs e Técnicos superiores (hixiene bucodental, imaxe para o diagnóstico, laboratorio... ) que tomaron posesión en maio de 2017, e que polo tanto non houbera cumprido o requisito de 3 anos como persoal estatutario fixo.

puzle 

Pero a proposta que se inclúe neste 4º borrador, non rectifica noutras cuestións tamén moi importantes, non avanza un só paso no recoñecemento profesional a través da longamente suspendida Carreira Profesional, xa que segue sen permitírsenos aos profesionais o acceso ao grado de carreira acadable polos anos de servizos prestados.

Pero sobre todo non avanza no recoñecemento de centos de profesionais temporais, nos que descansa unha parte moi significativa do servizo sanitario público, e que levan soportando anos de temporalidade, de contratación precaria e abusiva, sen oportunidade de acadar a condición de persoal fixo debido, nalgunhas categorías, ás exiguas ofertas de emprego, e noutras (persoal de hostalaría, persoal de mantemento) a carencia total de oferta de prazas dende o ano 2009.

O persoal temporal queda totalmente excluído do acceso á Carreira polo “sistema de encadre”, isto é queda excluído do acceso a retribución por este concepto.

É máis, coa proposta do Sergas, dentro do persoal temporal, só se lle permitirá o acceso a un denominado “grao inicial”, NON RETRIBUÍDO, ao persoal interino. O persoal eventual NIN SE MENCIONA.

Para rematar, engadir que trala entrega de xa catro borradores parciais, o SERGAS segue sen dicir cal vai ser o valor dos graos para cada colectivo.

CIG-Saúde insta a Sergas a que deixe de dilatar esta cuestión e que confirme xa o mantemento dos valores actuais dos graos de Carreira. Ningunha outra posibilidade sería aceptable.

Para seguir defendendo a xustiza no recoñecemento do servizo prestado polas/os profesionais, pola consolidación do principio de non discriminación entre o persoal temporal e fixo...

Pé páxina concentracións

O VII Congreso da CIG-Saúde reelixe a María Xosé Abuín como secretaria nacional

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

18-04-07 VIICongresoCIG Saude12

 

Tamén se renovou a Executiva e escolléronse os representantes da federación no Consello Confederal.

O VII Congreso da CIG-Saúde celebrado este sábado en Pontevedra reelixiu a María Xosé Abuín como secretaria nacional por 83 votos a favor, 12 en branco e 1 nulo. Durante o proceso, que se celebrou baixo o lema 'Forza e compromiso. Onte, hoxe e sempre!, tamén se renovou a Executiva nacional e escolléronse as persoas que representarán a federación no Consello Confederal.

18-04-07 VIICongresoCIG Saude51

 

 

 

 

 

 

 

 

 

 

 

Un hotel pontevedrés acolleu este sábado unha cita na que arredor dun cento de congresistas debateron e acordaron as liñas de traballo a desenvolver pola federación de Saúde durante os vindeiros catro anos, ademais de renovar os seus órganos de dirección. Ao proceso concorreu unha única lista, encabezada por María Xosé Abuín, que resultou reelixida secretaria nacional.

Abuín foi precisamente a encargada de defender o informe de xestión da Executiva saínte, unha vez que o alcalde de Pontevedra, Miguel Anxo Fernández Lores, se dirixiu a todos/as os presentes para agradecerlles que tivesen escollido a cidade para celebrar o encontro e animalos/as a continuar na defensa da sanidade pública e dos dereitos dos traballadores/as. O rexedor tamén aludiu á súa etapa como médico e delegado sindical da CIG.

O documento, que foi aprobado por unanimidade, comeza renovando a vixencia da frase coa que remataba o informe presentado no anterior Congreso: <<Nunca na historia da sanidade, e polo tanto no mundo sindical, asistimos en tan pouco tempo a un cambio tan destrutivo do noso sistema sanitario>>.

En consecuencia, foi necesario centrar a actividade sindical na defensa do sistema sanitario público, intentando paralizar as medidas de agresión e recortes, as discriminacións, os insultos á condición de traballadoras/es públicas/os do persoal da sanidade e os ataques neoliberais <<que só buscan un cambio de modelo que muda os valores da sanidade pública que defendemos polos do mercado>>. 

Nunca na historia da sanidade, e polo tanto no mundo sindical, asistimos en tan pouco tempo a un cambio tan destrutivo do noso sistema sanitario

Nos textos faise fincapé en que os cambios normativos instaurados polo PP, tanto no Estado español coma na Galiza, incrementaron a perda de dereitos laborais e consolidaron a perda do dereito ao acceso universal á sanidade pública. <<Durante estes catro anos o noso traballo sindical centrouse en mobilizacións e denuncias dos cambios normativos, contra a perda de dereitos, contra a privatización da sanidade pública e a rotura da equidade no acceso aos servizos sanitarios; todo isto fixo que, unha vez máis, nos diferenciaramos do resto de sindicatos estatais e corporativos na loita polos intereses xerais das traballadoras/es da sanidade pública galega que o actual Goberno do PP tenta destruír, feito que se viu reflectido nos últimos resultados das eleccións sindicais onde recuperamos a nosa condición de primeira forza sindical na sanidade pública>>.

Ao mesmo tempo, incídese en que foi necesario adaptar o traballo sindical para facer fronte ás novas formulas de xestión e privatización. Entre elas a creación das denominadas axencias, <<ao fronte das cales puxeron a persoas que cren que o sistema público só serve para pagar o seu salario, e as utilizan para a prolongación dos intereses privados; ano tras ano reducen o orzamento destinado ao gasto de persoal e investimentos, e pola contra medra o diñeiro que gastan en privatizacións. Crearon dous novos chiringuitos, chamados axencias, para introducir a xestión privada en algo tan fundamental coma é a investigación biomédica pública; e que sexa a industria farmacéutica quen se leve un maior beneficio da transferencia do coñecemento>>.

 

Tamén se denuncia que ao longo destes catro anos o PP, tanto desde o Goberno central como desde a Xunta, continuou coa súa política de privatización das infraestruturas sanitarias baixo o eufemismo de “colaboración pública privada”, cuxa máxima expresión foi a construción e posta en funcionamento do novo hospital de Vigo, <<no que a propiedade e a xestión das instalacións están en mans da empresa privada, e no que o Sergas estará de aluguer nos próximos 20 anos>>.

Neste modelo, ao xestionar a empresa privada concesionaria todos os servizos non sanitarios é ela quen subcontrata estes servizos con outras empresas, sen que o Sergas poida, nin sequera, opinar sobre as condicións da prestación destes servizos. <<Este modelo foi xustificado polo actual momento de crise económica, pero realmente agocha un cambio no modelo sanitario, dando cabida ao negocio das grandes corporacións>>.

Neste contexto, os recortes aplicados nos dereitos laborais tiveron unha repercusión lesiva nas condicións laborais e persoais do persoal. <<A aplicación deste recortes nos centros de traballo foi combatida con gran esforzo polas/os nosos/as delegadas/os, conseguindo coa súa insistencia unha aplicación menos lesiva destes recortes e unha aplicación máis correcta dos dereitos laborais ao persoal, fose este fixo ou temporal>>.

Con respecto á sanidade privada, incídese en que o traballo sindical da CIG neste sector <<é dabondo dificultoso en todos centros, tendo que loitar constantemente coas empresas, con outras organizacións sindicais e incluso cunha parte do persoal>>. Con todo, a central foi quen de obter uns bos resultados electorais nas comarcas da provincia da Coruña e Vigo, mentres que nas de Pontevedra, Lugo e Ourense foron menos positivos, o que lle permitiu manterse como segunda forza. Neste senso, saliéntase que alí onde a CIG ten maioría nas mesas de negociación dos convenios colectivos lógranse mellores condicións laborais e sociais.

 

18-04-07 VIICongresoCIG Saude34   

Incrementar a defensa da sanidade pública

A continuación deuse lectura ao relatorio de acción sindical, que marca as principais liñas de traballo a desenvolver nos vindeiros catro anos:<<O noso papel de defender, dentro da nosa actividade sindical, a sanidade pública, vai provocar que durante os próximos tempos teñamos que incrementar a defensa desta, con campañas de denuncia para explicar á poboación a consecuencia da aplicación destas normas e, a poder ser, incrementar as mobilizacións>>.

Así mesmo, recóllense os retos de futuro que deberá enfrontar a federación nun contexto no que a sanidade pública terá que enfrontar nos próximos anos importantes cambios derivados do incremento da esperanza de vida da poboación, que supón un importante incremento de pacientes crónicos, pluripatolóxicos e de idade avanzada. <<Entre os anos 2014 e 2029, segundo datos de Eurostat e do INE, Galiza vai perder o 28,8% da poboación menor de 15 anos, e verá incrementada nun 13,7% a poboación de entre 65 e 84 anos, e nun 44,2% a de 85 anos ou máis. Polo tanto, o papel da Atención Primaria tería que ser potenciado, pois só dende este nivel asistencial ten sentido unha resposta racional á cronicidade e a pluripatoloxía>>. Neste senso, a CIG-Saúde aposta por que a Atención Primaria sexa o eixo central do sistema sanitario público.

Finalmente, adiántase que a federación seguirá a cumprir o seu papel de representante das traballadoras/es, <<e non de colega da Administración>> e renóvase o compromiso coas empregadas/os do sector para informalas/os das intencións que ten o Sergas no referente ás súas condicións de traballo. <<A Administración, en conivencia co resto de organizacións sindicais, intenta pecharnos as portas das comisións de negociación, porque pensa que así vai limitar a nosa acción sindical, mais non lembra que a CIG-Saúde sempre medra fronte aos seus ataques>>.

Pola súa banda, no relatorio de organización lémbrase que dende a celebración das eleccións sindicais do ano 2007 <<estamos a sufrir unha campaña artellada polo PP coa que, sen rubor e aproveitando a maioría absoluta, pretende impoñer a reordenación do mapa sanitario; a campaña iniciouse coa creación das áreas de xestión integrada, e vai a ter a súa culminación coa modificación da Lei de Saúde de Galicia, que incluirá o paso definitivo onde se modifica o mapa sanitario de Galiza, pasando das 11 áreas sanitarias actuais a sete, das que dúas pasarían a ser de ámbito provincial>>. Deste xeito, as áreas de xestión integrada coincidirán coas áreas sanitarias.

 

Cara a folga xeral

O secretario xeral da CIG, Paulo Carril, tomou a palabra no acto de clausura unha vez rematada a intervención do secretario comarcal da CIG-Pontevedra, Marcos Conde, para saudar a nova dirección da federación de Saúde en nome da Executiva Confederal. O máximo responsábel da central salientou en primeiro lugar a “intachábel traxectoria da CIG-Saúde na defensa da sanidade pública”, cualificou a federación como “único baluarte en contra das privaticións” e animou a continuar a enfrontar o proceso mediante o que se pretende “darlle barra libre ao capital para que faga negocio coa saúde das persoas”.

Carril incidiu nos ataques que está a padecer tanto o sistema público como privado, con reducións de persoal e de medios, algo que afecta directamente á calidade asistencial. “A defensa da sanidade pública é fundamental para frear o agravamento da situación social que atravesamos”. Neste senso, advertiu que nos atopamos en risco de emerxencia social e que corremos o perigo de que se consolide a precariedade e a pobreza laboral como consecuencia da crise económica e das reformas aplicadas polos Gobernos do PP e do PSOE.

Fronte a isto, fixo fincapé na necesidade de acumular forzas e intensificar a mobilización. “Non podemos acomodarnos, temos que dar pasos cara a adiante como fixemos en 2010 coa convocatoria dunha folga xeral en solitario en defensa do sistema público de pensións ante o ataque perpetrado mediante a reforma pactada entre PP, PSOE, sindicatos estatais e patronal”. Reiterou a necesidade de pular pola derogación das reformas laborais, da negociación colectiva e das pensións e advertiu sobre “as mentiras e os discursos apocalípticos” que falan da quebra do sistema público de pensións. 

Para nós a unidade sindical constrúese dende abaixo, nos centros de traballo e non nas cúpulas

Neste punto aludiu ao debate iniciado na central sindical sobre a necesidade de abrir un proceso mobilizador que culmine na convocatoria da folga xeral, un dos maiores instrumentos que posúe a clase traballadora para defender os seus dereitos laborais e sociais. “Temos que dar unha resposta ao empobrecemento xeneralizado da maioría da poboación, e esa reposta pasa por levar adiante medidas atrevidas e por intensificar a contestación social”.

Precisamente baixo esta premisa a CIG celebrará asembleas de delegados/as a semana que vén en todas as comarcas do país para debater a respecto desta convocatoria e trasladarlle aos representantes sindicais a necesidade de que leven a todos os centros de traballo a conveniencia de apostar por unha folga xeral.

Ao mesmo tempo fixo un chamamento á unidade sindical, pero circunscribiuno a discutir nas empresas as reivindicacións que se plantexarían coa convocatoria da folga xeral e as alternativas que as centrais achegarían para rematar con esta situación. “Non descartamos facer un chamamento formal ás direccións de CCOO e UGT, pero para nós a unidade sindical constrúese dende abaixo, nos centros de traballo e non nas cúpulas”.

Intervención da secretaria nacional

A encargada de pechar o acto foi a recén reelixida secretaria nacional da CIG-Saúde, María Xosé Abuín, que comezou o seu discurso agradecendo a confianza depositada na nova dirección e reiterou o compromiso da federación coa loita sindical “e co traballo ben feito dende a nosa honestidade”. A continuación botou man dunha frase de Castelao para marcar os obxectivos dos vindeiros catro anos: <<O verdadeiro heroísmo consiste en converter os soños en realidade e as ideas en feitos>>.

Estas ideas que na súa opinión deberan converterse en feitos a través do “heroísmo” do traballo sindical pasan por lograr “unha Galiza na que sexamos donas de nós, na que sexamos capaces de tomar as nosas decisións”. A isto contrapuxo o avance na recentralización da negociación colectiva nas institucións da capital do Estado. “Unha parte importante das decisións das políticas de persoal tómase en Madrid, e con posterioridade nun acto de paripé ratifícanse estes acordos nas mesas de negociación do Sergas e da Función Pública”.

Nesta liña, chamou a combater nos próximas catro anos “non só as medidas que nos impón o Goberno do PP, senón que teremos que seguir a denunciar que estas medidas son froito dos pactos sindicais que se asinan en Madrid, e que o Goberno e as organizacións sindicais pactan que sexan norma básica para todo o Estado”, algo que vulnera o dereito á negociación das mesas sectoriais “e os nosos dereitos como país”.

Denunciou que estas decisións, que destrúen postos de traballo e condenan a moitas persoas á precariedade laboral e á emigración, adóptanse a cambio de prebendas. “Senón non é entendíbel que estas organizacións sindicais asinen taxas de reposición que eliminan emprego e facilitan privatizacións”.

Abuín pechou o seu discurso con outra frase, nesta ocasión de Rosalía de Castro: <<É feliz o que soñando morre e desgraciado o que morre sen soñar>>. “Nós seguiremos a combinar soños con heroísmo; queda moito por facer e ímolo conseguir”, rematou.

Executiva Nacional

Recibiu 87 votos a favor, 8 en branco e 1 nulo e queda integrada polas seguintes persoas:

-Mª Xosé Abuín Álvarez.

-Carmen Aira Díaz.

-Ana Lestón Gallardo.

-Manuel González Moreira.

-Sandra Martínez Yáñez.

-Mª Áurea Rodríguez Blanco (Marián).

-Xoana Zamudio Cutrín.

-Fernando Rivas Pérez.

-Víctor Vila López.

Consello Confederal

Os representantes da federación no Consello Confederal, que recibiron 95 votos a favor e 1 nulo, serán:

-Ana Lestón Gallardo.

-Xosé Manuel Marcote Baña.

 Ver nova en Avantar.

 
 
 
 
 
 
  • Ferramentas

  • Contratacións

  • Expedient-e

  • Lexislación

  • Ligazóns

  • Boletíns Oficiais

  • TOP ARTIGOS

  • App Móbil

  • Afíliate

           

Se tés un móbil ou tableta con Android, agora tés outro xeito de estares ao día nas noticias da CIG-SAÚDE.

Só tés que entrar no Google Play, poñer no buscador “cig-saude” e instalar a aplicación gratuíta que recolle as novas publicadas.

Recibirás un aviso na barra de alertas do teu aparello cada vez que se publique unha nova información nas webs da CIG-SAÚDE.


Podes ver a descrición da app e descargala premendo aquí.


Desde a CIG-Saúde queremos agradecer a Miguel Carrillo o desenvolvemento e distribución desta aplicación gratuíta.

     

ImaxeCampanhaAfiliacionCIG.preview

A CIG vén de poñer en marcha unha campaña de afiliación nunha nova aposta coa que respostar a todos os ataques que sofre a clase traballadora galega e o desmantelamento de Galiza. Con esta iniciativa preténdese consolidar e ampliar a nosa capacidade de resposta. Nos tempos que corren é vital afortalar a nosa organización sindical, que ten unha traxectoria histórica de firmeza, coherencia, insubornábel, de confronto co sistema, e constitúe unha alternativa ao sindicalismo español do pacto social e de colaboración co poder. 

afiliate

 
 

rss queremos-galego FUNDmonchoREBOIRAS

1leftarrow-icone-5226-48

 

Confederación Intersindical Galega - Federación de Saúde
Miguel F. Caaveiro, 10 - Santiago de Compostela 
Telf 981 55 28 26 - Fax 981 57 10 82
executiva@cig-saude.info - secretarianacional@cig-saude.info - saudelaboral@cig-saude.info

2uparrow-icone-4301-48 1rightarrow-icone-9847-48

Este sitio utiliza cookies propias e de terceiros para mellorar a experiencia dos e das usuarias. Máis información sobre as cookies, o seu uso, modificación ou eliminación en política de cookies.
Se estás de acordo, preme este botón: Acepto