Noticias Persoal Outras novas A CIG-Saúde denuncia que os vetos do PP desvirtúan a Comisión de Sanidade creada no Parlamento de Galiza
 
 

A CIG-Saúde denuncia que os vetos do PP desvirtúan a Comisión de Sanidade creada no Parlamento de Galiza

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

Lamenta a marcha dos grupos da oposición e que se perda a oportunidade de abordar a situación da sanidade pública

CIGSAUDElogo

Compostela, 2 de novembro de 2018.- 

A raíz do falecemento dun doente no PAC da Estrada, os grupos da oposición impulsaron a creación dunha comisión de investigación no Parlamento de Galiza para analizar o que acontecera neste caso, mais tamén para coñecer a situación real da sanidade pública galega. Porén, o PP impuxo a súa maioría absoluta e vetou comparecencias propostas pola oposición impoñendo un plan de traballo que desvirtúa o sentido para o que estaba concibida. A CIG-Saúde denuncia a actitude do PP e lamenta que se perda a oportunidade de abordar a situación da sanidade pública a través das/os súas/seus protagonistas.

María Xosé Abuín, secretaria nacional de CIG-Saúde, lembra que só se pode pedir, desde a oposición, unha comisión por lexislatura. Aproveitando esta circunstancia, e por común acordo entre os tres grupos da oposición, impulsaron esta comisión de Sanidade. “O PP o que fixo foi vetar as propostas de quen estes grupos parlamentarios cren que deberían participar nesa comisión, dándolle voz a un colectivo amplo de persoas representativas que traballan na sanidade pública de distintas categorías e sectores. Persoas que poderían aportar claridade ao que está acontecendo para, a partir de aí, buscar unha mellor solución aos problemas que a sanidade pública galega ten”.

Abuín lamenta que por mor desta negativa do PP a aceptar o plan de traballo os grupos parlamentarios se viran obrigados a abandonar esta comisión. E é que o Partido Popular “por non querer, non quere nin que participe a familia” do doente falecido na Estrada, denuncia. Considera que esta comisión tiña sentido para investigar o que acontecera no PAC da Estrada, a situación na que se atopan os PACs e en xeral a situación na que se atopa a sanidade pública. “Unha vez non acepta as propostas da oposición e limita a determinadas persoas e colectivos a comparecencia, está matando o sentido que tiña”.

Para a secretaria nacional da CIG-Saúde este veto do PP responde ao “medo que teñen a que se fale no Parlamento da situación que realmente ten da sanidade pública galega, desde distintos puntos de vista”. Denuncia que, por exemplo, se vete a comparecencia do persoal investigador e pregúntase “por que non queren que se fale da situación na que se atopan”, mais cando “presumen de que grazas ao seu traballo se participa en proxectos internacionais e de que a investigación pública está en estándares de calidade europeos e internacionais, como non se vai poder falar da situación que padecen?”.

Reconducir a situación

A CIG-Saúde exixe, por iso, que se reconduza esta situación para que a comisión de sanidade non se converta nun chiringuito onde só o PP dite as liñas que ten que ter. “Ten que ser representativa e, por iso, ten que aceptar as propostas da oposición para que un amplo sector de traballadores/as, de docentes e de asociacións poida ir ao parlamento que é a casa de todos/as”, afirma Abuín.

A secretaria nacional da CIG-Saúde convida ao PP a “non lle ter medo e que a xente poidamos ir alí a explicar todo desde distintos ámbitos, desde distintos sectores, desde distintos profesionais o que pasa na sanidade, porque todos/as formamos parte da sanidade pública”.

 
 
 
 
 
 
 
 

rss queremos-galego FUNDmonchoREBOIRAS

1leftarrow-icone-5226-48

 

Confederación Intersindical Galega - Federación de Saúde
Miguel F. Caaveiro, 10 - Santiago de Compostela 
Telf 981 55 28 26 - Fax 981 57 10 82
executiva@cig-saude.info - secretarianacional@cig-saude.info - saudelaboral@cig-saude.info

2uparrow-icone-4301-48 1rightarrow-icone-9847-48

Este sitio utiliza cookies propias e de terceiros para mellorar a experiencia dos e das usuarias. Máis información sobre as cookies, o seu uso, modificación ou eliminación en política de cookies.
Se estás de acordo, preme este botón: Acepto