Noticias Política Sanitaria Novas sobre Política Sanitaria O Goberno central reduce en 6,5 millóns os orzamentos destinados ao Plan Estatal de Loita contra a drogadicción
 
 

O Goberno central reduce en 6,5 millóns os orzamentos destinados ao Plan Estatal de Loita contra a drogadicción

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

CIG-Saúde denuncia que a Galiza se lle reduce en 431.000 € e alerta de que, no futuro, isto terá graves consecuencias, provocando problemas de saúde pública que afectarán a toda a poboación

Na primeira reunión sectorial do Plan Estatal de Loita contra a Drogadicción, celebrada onte en Madrid, o representante do Ministerio anunciou que o Orzamento para o próximo ano será de 11,98 millóns de euros para repartir entre o conxunto das CCAA. CIG-Saúde denuncia que o goberno central destinará así 6,5 millóns menos a este plan, dos cales corresponde a Galiza unha redución de 431.000 €. “Faise esta redución ao tempo que se salienta a necesidade de que os gobernos central e autonómicos reforcen a loita contra o consumo de drogas, nomeadamente entre a mocidade e as mulleres”, di a secretaria nacional de CIG-Saúde, María Xosé Abuín.
.
O orzamento que o Goberno Central destinou  no ano 2011 para o Plan Estatal de Drogas foi de 18.5 millóns de €. Agora co goberno do PP inmerso nunha espiral de recortes, “destinada a empeorar a calidade de vida das persoas que máis o necesitan, diminúe drasticamente o orzamento para o próximo ano, que pasa a ser de 11, 98 millóns de euros, 6,5 millóns menos”, explica a secretaria nacional de CIG-Saúde.

A isto engade que a Galiza correspondéronlle 1.179.548 euros o ano pasado. A asignación agora será de 748.519,81, polo tanto redúceselle o orzamento en 431 mil €, ao que hai que engadirlle que, desde a toma de posesión do goberno do PP na Xunta, a Consellaría de Sanidade reduciu o montante total asignado nos orzamentos de 2012 en máis de 1.400.000 €, o que tivo como consecuencia unha diminución importante das actividades que se realizan. Alerta que a esta redución, haberá que sumarlle a previsíbel diminución orzamentaria que a Consellaría de Sanidade faga nos orzamentos do ano 2013.

Con esta medida o único que pretenden os gobernos central e da Xunta “é dar por finiquitado o plan galego de drogas, que leva en activo máis de 20 anos cun traballo de recoñecido prestixio, que serviu de modelo para que outras CCAA e outros países elaboraran os seus propios plans”.

CIG-Saúde denuncia que esta redución orzamentaria está englobada nas medidas de política sanitaria do Partido Popular “destinadas a eliminar das prestacións sanitarias aos colectivos máis desfavorecidos socialmente e que, de continuar nesta senda, no futuro provocarán graves problemas de saúde pública que afectarán a toda a poboación”.

Denuncia, unha vez máis, a actitude do PP que cos cartos públicos está a lexislar medidas dirixidas a favorecer a quen máis recursos económicos ten, negándolle á asistencia sanitaria ás persoas que máis risco teñen de estar en situación de exclusión social.

Ante isto, fai un chamamento a non ser cómplices desta situación e defende que outras medidas son posíbeis para preservar a sanidade pública, universal e gratuíta.

Noticia extraída de Avantar.

 
 
 
 
 
 
 
 

rss queremos-galego FUNDmonchoREBOIRAS

1leftarrow-icone-5226-48

 

Confederación Intersindical Galega - Federación de Saúde
Miguel F. Caaveiro, 10 - Santiago de Compostela 
Telf 981 55 28 26 - Fax 981 57 10 82
executiva@cig-saude.info - secretarianacional@cig-saude.info - saudelaboral@cig-saude.info

2uparrow-icone-4301-48 1rightarrow-icone-9847-48

Este sitio utiliza cookies propias e de terceiros para mellorar a experiencia dos e das usuarias. Máis información sobre as cookies, o seu uso, modificación ou eliminación en política de cookies.
Se estás de acordo, preme este botón: Acepto