Inicio
 
 

Mobilizacións

Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

Botan a andar no 2º día as marchas galegas polo emprego

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo
Centos de desempregados/as súmanse ao percorrido cara a Compostela que organiza a CIG

A Marcha galega polo emprego da CIG segue a sumar efectivos na súa segunda xornada. Hoxe incorporáronse á mobilización cara a Compostela parados e paradas da Coruña e de Vigo. O grupo máis numeroso, integrado por máis de 100 persoas, partiu da cidade olívica pouco antes das nove da mañá acompañado polo secretario comarcal, Serafín Otero, que percorreu xunto a eles os primeiros quilómetros. A mobilización da Coruña, na que tamén participa o secretario comarcal, Paulo Carril, contou coa presenza do secretario xeral da CIG, Suso Seixo, quen sinalou que con estas marchas preténdese chamar a atención sobre o gran problema que golpea nestes momentos a Galiza: o desemprego.

 

No noso país hai máis de 240.000 parados e paradas e máis de 70.000 familias que teñen a todos os seus membros sen traballo. “Estamos ante unha situación dramática e preocupante, porque as políticas que se están a aplicar non axudan a que teñamos perspectiva de que se vaia crear emprego”. Máis ben pola contra, apuntou Seixo, as políticas chamadas de “austeridade” e o recorte do gasto público provocarán maiores taxas de desemprego. Ao que se engaden as tentativas por parte dos gobernos de derivar as rendas da clase traballadora ás empresas coa perspectivas de que así se vaian crear postos de traballo. Expectativas que, matizou, son totalmente falsas, como se ten demostrado.

Como exemplo, expuxo o caso de Telefónica, unha empresa que con 10.000 millóns de euros de beneficios o ano pasado vén de presentar un expediente de extinción de contratos para 8.000 traballadores/as. “Ou se mudan as políticas ou as posibilidades de creación de emprego serán moi poucas”, denunciou Seixo.

 

 

Un problema de toda a sociedade

Coas marchas, a CIG quere facer unha chamada á solidariedade con aqueles traballadores e traballadoras que nestes momentos están pasando por unha situación tan complicada como a que supón estar no desemprego. A este respecto, o secretario xeral da CIG sinalou que a sociedade ten que percibir ás claras que a problemática do desemprego non se limita só aos parados e paradas, senón que é unha lacra social e económica que afecta ao conxunto do país e a toda a sociedade.

Do mesmo xeito, preténdese mandar unha mensaxe ao colectivo de parados e paradas para que non caian na pasividade e “que se decaten de que a única maneira de mudar esta situación para a clase traballadora é a través da organización, a mobilización e a contestación social. Senón, é evidente que os gobernos non van mudar as políticas de recortes que están a levar a cabo”, asegurou Seixo.

 

 

 

 

 

Unha chamada contra a resignación

Antes de iniciar a marcha, os/as voceiros da Marcha da Coruña explicaban aos medios de comunicación os motivos que os levaron a participar desta mobilización. Duarte Abade, parado do sector servizos dende hai un ano e licenciado, puxo o acento na necesidade de que os desempregados/as galegos/as se mobilicen “para non caer na resignación e porque é importante que como clase traballadora, porque os parados/as seguimos a ser parte da clase traballadora, non abandonemos a loita polos nosos dereitos sociais e laborais”.

Parada e cunha licenciatura en Historia debaixo do brazo dende hai un ano, Águeda Rei, representa o día a día de moitos mozos e mozas galegas: a procura imposíbel dun emprego. Rei lembrou que na Galiza nestes intres hai unha taxa de paro xuvenil do 40%, unha das máis elevadas de Europa. Alén das dificultades para atopar un traballo, Águeda Rei denunciou as precarias condicións laborais nas que os mozos e mozas se ven obrigados a traballar. Neste senso, criticou que un dos supostos revulsivos económicos da comarca da Coruña, o macro centro comercial Marineda City, represente precisamente este tipo de contratación precaria, inestábel e sen dereitos. A propia Rei vén de ser despedida da superficie comercial logo de ser contratada por un período de tres meses. “En canto teñen que facerche un contrato estábel as empresas bótante á rúa”, denunciou.

“Iniciativas como esta son moi necesarias. É importante que a mocidade galega responda á crítica situación na que nos están condenando a vivir. Non queremos ter que emigrar para poder traballar”, aseverou.

Ler máis

Marcha galega polo emprego

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

A CIG lanza unha “Marcha galega polo emprego” que rematará o 3 de xullo en Compostela cunha manifestación nacional

Demanda a creación dun Salario de Inserción Social para garantir que os parados que non cobran xa ningunha prestación, un 40% do total, non caian na “pobreza e a marxinalidade”
A CIG presentou en rolda de prensa, a “Marcha Galega polo Emprego”. Unha gran mobilización na que se agarda que participen desempregados/as de toda Galiza, que percorrerán a pé o país, partindo inicialmente das cidades, o día 29 de xuño, para rematar o 3 de xullo en Compostela, cunha manifestación nacional. Con esta marcha preténdese sensibilizar á poboación ante o grande problema que supón o paro e exixir a posta en marcha de toda unha serie de medidas que permitan o crecemento económico e a creación de emprego, fronte as políticas neoliberais aplicadas até o de agora, que provocaron unicamente a precarización das condicións laborais.

 

Neste sentido, o secretario xeral da CIG, Suso Seixo, quen compareceu acompañado polo secretario confederal de Comunicación, Francisco Miranda Vigo, lembrou que un 40% dos parados/as galegos no cobran prestación de ningún tipo, polo que demandou a creación dun Salario de Inserción Laboral. “É fundamental garantir que estes traballadores/as conten cunha cobertura que garanta uns ingresos básicos, mentres non teñen unha saída laboral”.

Para a CIG, este salario estaría acompañado doutras medidas, como a asistencia a cursos para diversificar a súa formación e unha atención personalizada para facilitar que se atope un posto de traballo.

 

Seixo salientou ademais que hoxe, o desemprego, é unha das preocupacións fundamentais da poboación, non só pola súa incidencia senón tamén porque as previsións non permiten albiscar unha pronta saída da recesión económica.

Lembrou que segundo a EPA do primeiro trimestre, en Galiza hai máis de 226.000 parados/as, cifra que se incrementa até os 250.000 se se toman como referencia os últimos datos de paro rexistrado.

 

Alén diso, considerou especialmente grave que nos últimos dous anos se perderan máis de 100.000 postos de traballo no sector industrial, fundamental polo seu peso estrutural e porque se trata de emprego de calidade. Como grave considerou tamén que o 51% dos desempregados/as sexan menores de 35 anos.

A este respecto, criticou expresamente a actitude da Xunta de Galiza, por “cruzarse de brazos ante esta problemática e mirar para outro lado, sen adoptar medida algunha, máis alá de campañas publicitarias que ao final non se traducen na creación de emprego real”. A isto engadiu que “os 100.000 empregos que se perderon nos anos 2009 e 2010 en Galiza, foron baixo o goberno de Núñez Feijoo e do Partido Popular”.

 

Políticas neoliberais

O secretario xeral da CIG asegurou ademais que todas as políticas neoliberais que se veñen poñendo en marcha desde os distintos gobernos, centradas na redución dos investimentos públicos, no incremento dos impostos indirectos e na precarizarización das condicións laborais (reducindo salarios e recortando dereitos), lonxe de favorecer o crecemento económico están a provocar unha redución da capacidade adquisitiva da clase traballadora. “Iso incide na caída do consumo interno, frea o crecemento económico e provoca a perda de máis postos de traballo”.

A iso engadiu que o pouco emprego que se está a crear é de moi baixa calidade, tal e como constatan as cifras de temporalidade, e que se está a favorecer a fraude na contratación, ao subvencionarse os empregos a tempo parcial, cando despois os traballadores fan xornadas completas sen cobralas. “Camiñamos cara un modelo produtivo que non favorece o crecemento da economía.

Fronte a isto, a CIG exixe que se aumenten os investimentos públicos; a creación de empresas públicas e dunha banca pública; unha reforma fiscal profunda, coa recuperación do imposto de patrimonio, o incremento dos impostos sobre as rendas do capital e mecanismos para combater a fraude fiscal. Deste xeito, a central sindical entende que se podería reducir o déficit sen precarizar, aínda máis, as condicións laborais, favorecer o crecemento económico e, en consecuencia, a creación de emprego.

 

Nova en Avantar.

A Asociación Galega de Profesionais de Drogodependencias reclama medidas para garantir a calidade dos dispositivos actuais

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo
Denuncia a supresión ou redución de programas e actividades; recortes económicos de máis dun millón de euros en 2010, respecto de 2009 e recortes de persoal

A Asociación Galega de Profesionais de Drogodependencias e outras Condutas Aditivas reclamou esta mañá, en rolda de prensa, que no novo Plan de Trastornos Aditivos se incorporen obxectivos e medidas para garantir a continuidade e calidade dos dispositivos de drogodependencias actuais. Ao tempo denunciou os recortes económicos e de persoal e a supresión ou redución dalgúns dos programas e actividades que se levan a cabo. Unha situación que está a provocar incerteza ante a falta de garantías de continuidade dos recursos actuais.

A Asociación Galega de Profesionais de Drogodependencias, co respaldo de diversas organizacións sindicais, entre elas a CIG-Saúde e coa presenza de máis de 30 profesionais na propia rolda de prensa, lembrou que o último Plan de Galiza sobre Drogas rematou no 2009 sen que se cumpriran moitos dos obxectivos do mesmo, e denunciou que nestes momentos está en fase de aprobación o Plan de Trastornos Aditivos 2011-2016. “Un plan que non recolle as demandas dos/as profesionais nin das asociacións”, sinalaron.

Xunto a iso, denunciaron os recortes, tanto orzamentarios como de programas que está a sufrir a rede, que supuxo que no ano 2010 os centros asistenciais recibiran, no seu conxunto, máis de un millón de euros menos que en 2009.

 

 

Ler máis

Éxito da manifestación en Madrid

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

Máis de 6.000 persoas maniféstanse polas rúas de Madrid contra as reformas laboral, das pensións e da negociación colectiva

“Polo dereito a decidir as nosas condicións laborais e sociais”
Arredor de 6.000 persoas -entre as que participaron uns 1.500 delegados e delegadas da CIG- manifestáronse polas rúas de Madrid na mobilización convocada polas organizacións sindicais nacionalistas vascas ELA, LAB, STEE-EILAS, EHNE, HIRU, a catalá CSC, a canaria IC e a CIG, baixo o lema “Polo dereito a decidir as nosas condicións laborais e sociais”.

A manifestación, que durou aproximadamente unha hora, partiu do Pazo de Congresos e Exposicións, na Praza Juan Miró, para a continuación percorrer o Paseo da Castellana cara a Nuevos Ministerios e rematar diante do Ministerio de Traballo.

Durante a marcha, que rematou con música de gaitas e txalaparta, berráronse consignas como “Non falta diñeiro, sobran ladróns”; “Nin pacto social, nin reforma laboral”, “Zapatero, cabrón, traballa de peón”; “PSOE-PP, a mesma merda é” ou “CCOO-UGT, sindicatos do poder”. Os secretarios xerais de ELA, Adolfo Muñoz, ‘Txiki’; LAB, Ainhoa Etxaide e Suso Seixo, da CIG, pecharon o acto, ao que puxo punto final a Internacional.

Seixo comezou lembrando que as organizacións sindicais convocantes veñen demostrando que están decididas a mobilizarse en defensa da “dignidade e dos dereitos dos traballadores e traballadoras”, como xa fixeron na folga xeral convocada para o pasado 27 de xaneiro contra a reforma das pensións.

Neste sentido, a secretaria xeral de LAB, Ainhoa Etxaide, salientou o valor que ten a manifestación convocada hoxe en Madrid, porque é imprescindíbel unir forzas e porque “non se pode ir da man do goberno porque están en nómina do poder económico”, afirmou.

 

“Non todo o sindicalismo actuante no estado español está domesticado e ao servizo do poder”

Os secretarios xerais da CIG, ELA e LAB foron especialmente críticos con CCOO e UGT, aos que acusaron de asinar unha reforma, a das pensións, amparándose no chamado ‘Pacto Social’, que supón, segundo explicou Seixo, unha “traizón aos intereses da clase traballadora”, porque favorece ao neoliberalismo e persegue, ademais a “desmobilización”, nun momento no que sería necesario xusto o contrario “se queremos parar estas políticas tan agresivas contra os intereses da maioría social”, dixo, lembrando que “non todo o sindicalismo actuante no estado español está domesticado e ao servizo do poder”.

A este respecto, o secretario xeral de ELA, Adolfo Muñoz, ‘Txiki’, afirmou que “estamos ante o maior ataque en décadas aos dereitos sociais” e denunciou que estes ataques están contando, ademais, con cobertura política.

Uns recortes avalados por CCOO e UGT que supoñen, para a secretaria xeral de LAB “un caso único en Europa”, porque en ningún outro país teñen, as organizacións sindicais, apoiado estas medidas regresivas.

Para Suso Seixo non é casual que nese ‘Pacto Social’ non figure ningunha medida que poida “molestar” aos verdadeiros responsábeis da crise -os especuladores e o capital financeiro- como incrementos de impostos ao capital, ás grandes fortunas ou ás rendas máis altas ou medidas para acabar cos paraísos fiscais, controlar os movementos do capital, crear unha banca pública ou oporse á privatización de empresas e servizos públicos.

Na mesma liña, o secretario xeral de ELA, Txiki, insistiu na necesidade de que nun momento como este, se faga máis fincapé que nunca na ideoloxía, porque “foi precisamente a ideoloxía neoliberal a que nos conduciu a esta situación”.

De feito, Seixo denunciou que coas políticas económicas e sociais impostas polo goberno o que se busca é, precisamente, consolidar o modelo neoliberal, favorecer os intereses dos especuladores, da banca e das empresas multinacionais, transferindo ao capital miles de millóns de euros do patrimonio público e dos salarios dos traballadores e traballadoras.  Transferencia que o secretario xeral de ELA definiu como “saqueo”.

 

Reforma da negociación colectiva

Porén, foi na reforma da negociación colectiva na que máis incidiron os representantes das organizacións sindicais. Unha reforma coa que, para o secretario xeral da CIG, se pretenden impor convenios marco estatais en todos os sectores, o que vai provocar unha maior burocratización da negociación, apartala da participación e do control dos traballadores/as e dificultar a participación das organizacións sindicais que practican un sindicalismo distinto ao de CCOO e UGT.

Por iso anunciaron que non aceptarán a imposición desta reforma e que continuarán loitando “polo dereito a decidir as nosas condicións laborais e sociais e por un novo modelo económico e social”.

 

Galería de imaxes

 

Artigo extraido de Avantar.

A CIG mobilizarase en Madrid o 5 de abril contra as reformas do Goberno e polo dereito a decidir as condicións laborais

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo
A manifestación está convocada de xeito conxunto coa maioría sindical vasca e agárdase tamén a participación de organizacións cataláns e canarias.

CIG-Saúde participará na manifestación cunha pancarta co lema: "Non á entrada das ETTs na Sanidade Pública".

A Confederación Intersindical Galega e a maioría sindical vasca (ELA, LAB, STEE-EILAS, EHNE e HIRU) van desenvolver unha manifestación o vindeiro 5 de abril en Madrid en contra das reformas do goberno (concretamente a reforma das pensións e da negociación colectiva) e na defensa do dereito a decidir nos propios territorios as condicións laborais e sociais. Na marcha agárdase que participen arredor de 3.500 delegados e delegadas de todas as organizacións sindicais, dos/as que uns 1.200 serán representantes sindicais da CIG.

“Queremos que o goberno español visualice que no estado existe unha contestación ás reformas que nos están impondo e dinámicas sindicais distintas á política de pacto social practicada por CCOO e UGT”. Así resumía o Secretario Xeral da CIG, Suso Seixo, o obxecto da convocatoria que a central nacionalista, xunto a ELA, LAB, STEE-EILAS, EHNE e HIRU vai realizar o vindeiro martes 5 de abril en Madrid, dando continuidade á campaña de mobilizacións que estas centrais sindicais veñen realizando contra do conxunto de reformas promovidas dende os gobernos, incluída a folga xeral do pasado 27 de xaneiro.

A manifestación, explicou Seixo, que compareceu en rolda de prensa xunto ao Secretario Confederal de Comunicación da CIG, Francisco Miranda Vigo, sairá dende os arredores do campo de fútbol Santiago Bernabeu e marchará até as portas do Ministerio de Traballo e Inmigración. Aínda que a idea orixinal era rematar diante Congreso, este percorrido non foi finalmente autorizado.

Alén dos arredor de 3.500 delegados e delegadas que se agarda participen na manifestación, estase á espera de confirmar a presenza dos sindicatos cataláns e canarios, así como, apuntou Miranda Vigo, tamén amosaron a súa intención de participar na marcha organizacións que veñen de constituírse logo de romper coa dinámica sindical de UGT e CCOO e que xa convocaran paros de solidariedade durante a xornada de folga do 27 de xaneiro.

Ler máis

 
 
 
 
 
 
 
 

rss queremos-galego FUNDmonchoREBOIRAS

1leftarrow-icone-5226-48

 

Confederación Intersindical Galega - Federación de Saúde
Miguel F. Caaveiro, 10 - Santiago de Compostela 
Telf 981 55 28 26 - Fax 981 57 10 82
executiva@cig-saude.info - secretarianacional@cig-saude.info - saudelaboral@cig-saude.info

2uparrow-icone-4301-48 1rightarrow-icone-9847-48

Este sitio utiliza cookies propias e de terceiros para mellorar a experiencia dos e das usuarias. Máis información sobre as cookies, o seu uso, modificación ou eliminación en política de cookies.
Se estás de acordo, preme este botón: Acepto