Noticias Sanidade Pública Outras novas
 
 

A CIG-Saúde exixe un Plano de Ordenación de Recursos Humanos en Atención Primaria

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

A CIG-Saúde exixe un Plano de Ordenación de Recursos Humanos en Atención Primaria

Demanda a supresión da taxa de reposición e unha previsión das xubilacións que se van producir

Nacional - 27 Set 2019

A CIG-Saúde reclama ao SERGAS o cumprimento do compromiso adquirido o pasado día 8 de abril de negociar en mesa sectorial as materias que lle afectan ao persoal de Atención Primaria, coa elaboración dun Plan de Ordenación de Recursos Humanos que identifique as necesidades de persoal para dar solucións.

A secretaria nacional de CIG-Saúde, María Xosé Abuín denuncia que non se está dando unha solución real ao déficit de persoal porque “o SERGAS non facilita a información necesaria para saber cales son, en concreto, os déficits de persoal e as previsións de cobertura dos próximos anos tendo en conta as xubilacións que se van a producir”.

Por iso entende que “se non hai un diagnóstico de necesidades mal pode haber propostas de solución ás mesmas” e exixe que se aborde este tema “co rigor e a transparencia que merece a cuestión, porque até o de agora o que fixo o SERGAS foi lexitimar as súas políticas con medidas erradas”.

Vacantes por xubilación previstas

Para a CIG-Saude ese Plan de Ordenación debe contemplar, entre outras cuestións, as prazas vacantes por xubilación, no período 2010-2019, desagregadas por EOXI, Centro de Saúde e PACs. “Temos ademais que saber previamente cantas destas prazas están cubertas con persoal fixo, interino ou eventual e cantas seguen vacantes ou están amortizadas, porque non sabemos sequera iso”, indica Abuín.

Xunto a isto demanda que se dea conta do número de prazas vacantes que se van producir por xubilación no período 2020-2025 e tamén o número de persoas que está a prolongar a súa vida laboral e que nos vindeiros anos accederá á xubilación forzosa ao cumprir os 70 anos.

Para facer un estudo de necesidades real, ademais deste datos, reclama que se informe do número de tarxetas sanitarias que ten cada profesional agrupados por idades, porque “non é igual quen teña un determinado número de crónicos ou de persoas de maior idade, que quen non e iso tamén ten que ser planificado”.

Con todo isto Abuín entende que si se podería saber cales son as necesidades reais do sistema, tanto agora, como no futuro para poder planificar axeitadamente. “A improvisación non pode seguir sendo un mérito porque só leva á precariedade laboral e a unha desatención da poboación”, asegura a secretaria nacional da CIG-Saúde.

Supresión da taxa de reposición

Parello a isto a CIG-Saúde considera que o goberno galego ten que rematar coa taxa de reposición para que se podan convocar o 100% das prazas vacantes en OPE e traslados. “Con esta medida evitaríase que o persoal seguira encadeando contratos sucesivos para cubrir postos estables e poderíanse crear novas prazas estables para dar resposta ás novas necesidades asistenciais”.

A CIG-Saúde lembra que o goberno galego “é o responsable da taxa de reposición” e fai un chamamento a quen colaboraron na decisión de mantela. “Estamos a falar dos colexios médicos que, co seu silencio permitiron que se mantivera; os sindicatos asinantes que, coa súa sinatura, lexitiman a taxa de reposición até 2020 e os partidos políticos que nunca presentaron ningunha iniciativa –e seguen sen presentala- para eliminar a taxa de reposición”.

A este respecto María Xosé Abuín exixe que “alén das declaracións públicos en defensa da sanidade pública precísase de accións que sexan verdadeiramente acordes co discurso que se esgrime”.

A CIG-Saúde insiste en que a sanidade pública necesita dunha Atención Primaria que dea resposta ás necesidades de saúde da poboación e que as/os profesionais necesitan traballar en condicións dignas e de estabilidade para ofertar unha asistencia sanitaria de calidade “dedicando o seu tempo a pór os seus coñecementos ao servizo da poboación e non perdelo resolvendo as trabas que lle pon a administración”.

A CIG-Saúde reclama a recuperación dos acordos retributivos do persoal do SERGAS

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

imaxe concentracion

Delegados/as concentráronse hoxe diante da consellaría de Sanidade

Nacional - 25 Set 2019

 

Delegados e delegadas de CIG-Saúde concentráronse esta mañá diante da consellaría de Sanidade para reclamar a apertura dun proceso de negociación no que se acorde un calendario que permita a recuperación dos acordos aprobados en mesa sectorial en 2008 e suspendidos coa chegada do goberno Feijóo en 2010. Previa a concentración solicitárase ser recibidos pola consellaría para tratar esta cuestión. Porén foi un policía o que comunicou que non había ninguén hoxe para atendelos. “Preguntámonos se este é o novo modelo de relacións laborais da Xunta, que o noso único interlocutor sexa o policía da porta”.

Así o manifestaba, con indignación, a secretaria nacional de CIG-Saúde, María Xosé Abuín, para quen “esta non é forma de tratar á representación do sindicato maioritario no SERGAS” nin pode servir como escusa para que non se atendan as demandas do persoal “malia termos reiterado esta petición desde o ano 2013”.

Abuín lembrou que “daquela tanto o Presidente da Xunta como o conselleiro de Facenda falaban de que estabamos na senda da recuperación e do crecemento, pero seguiron castigando ao persoal do SERGAS. O único que demandamos é que se recuperen eses acordos”.

Abuín explica que neses acordos contemplábase que o persoal do SERGAS que traballa a quendas rotatorias de mañá, tarde e noite, os 365 días se lle recoñecera este complemento específico. Porén, ademais de suspender eses acordos, a secretaria nacional de CIG-Saúde denuncia a “discriminación salarial” existente con respecto ao resto do persoal da administración autonómica “que superan os 250€ mensuais”.

Segundo explicou, para igualar as retribucións por categorías ao mesmo nivel entre o persoal do SERGAS e o persoal traballador/a da administración autonómica que traballa en quenda de mañá, de luns a venres, “o persoal do SERGAS ten que traballar en quenda rotatoria de mañá, tarde e noite cunha prestación efectiva de servizo de 3 noites e un festivo mensual”.

Por iso se cuestionou que clase de apoio se lle está a dar ás traballadoras e traballadores da sanidade pública “se nos condenan a ter unhas retribucións precarias e situarnos case á cola dos servizos de saúde”.

Orzamentos 2020

María Xosé Abuín exixiu ademais que estas demandas se teñan en conta á hora de elaborar os orzamentos para 2020 e que previo a iso se negocie en mesa sectorial un calendario para que ano a ano esa recuperación salarial se vaia facendo efectiva. “Non exiximos máis que o que el mesmo demanda do resto das administracións, que cumpra os compromisos”.

Ademais cuestionou que se utilicen “os 700 millóns do Estado” para xustificar que non se inclúe esta recuperación. “Non nos valen as desculpas de Feijóo, porque cando goberna en Madrid o PP todo está ben e a economía vai de marabilla e en 6 meses resulta que é un caos. Pois algunha responsabilidade tamén ten el”.

Carta ao Conselleiro "Por uns orzamentos 2020 dignos"

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

Concentracion-Orzamentos-25-SET-2019

Jesus Vázquez Almuiña
Conselleiro de Sanidade.

Desde o ano 1991, tras o acordo asinado polo actual presidente da Xunta de Galiza, en calidade de Secretario Xeral Técnico da Consellaría de Sanidade, o persoal do Servizo Galego de Saúde está a ter unha penalización nas súas retribucións, en concreto no complemento específico.

Lembramos que o complemento específico está destinado a retribuír as condicións particulares dos postos de traballo e atención a súa especial dificultade técnica, dedicación, responsabilidade, incompatibilidade, perigosidade e penosidade.

Se a contía que percibe por este concepto o persoal do SERGAS, é inferior á que percibe o persoal da Administración, isto supón unha discriminación retributiva non xustificada; máximo cando ao persoal do SERGAS se lle require, a maiores, como requisito unha titulación específica.

Esta discriminación retributiva, como se pode comprobar na Orde de confección de nóminas da Xunta de Galiza, demostra que para o goberno galego e para a súa consellaría, ten a mesma consideración a prestación de servizo en quenda diúrna, de luns a venres, horario que realiza o persoal da administración; que a prestación a quendas nas 24 hs do día (mañá, tarde ou noite) os 365 días do ano que realiza o persoal do SERGAS.

Até o de agora, a desculpa que vostedes utilizaban era que o persoal do SERGAS percibía a retribución da carreira profesional, agora a carreira profesional vaina percibir, tamén , o persoal da Administración.

No ano 2008, no marco da mesa sectorial do SERGAS, asinamos un acordo retributivo que ía a corrixir esta débeda que o goberno galego ten co persoal do SERGAS desde o ano 1991. Dito acordo tiña un calendario de execución 2008/12 , e un compromiso dunha nova negociación no ano 2013.

No ano 2010 o goberno galego suspendeu este acordo, castigando unha vez máis, e dobremente, ao persoal do SERGAS, con reiteradas negativas a negociar na mesa sectorial un calendario de recuperación do acordo suspendido.

Agora, o goberno galego está a desbloquear outros acordos co argumento que estamos na senda do crecemento, crecemento que non pode excluír ao persoal do SERGAS.

Por todo isto, solicitamos ter unha reunión con vostede para transmitirlle a nosa petición de recuperación dos acordos suspendidos.

Desde CIG-SAÚDE solicitamos que nesta reunión se poida desbloquear a suspensión destes acordos e que se inclúa a súa recuperación nos orzamentos do ano 2020.

Agardamos recibir unha convocatoria de reunión na maior brevidade posible.

Atentamente.

Compostela, 23 de setembro de 2019.

Asdo: Mª Xosé Abuín Álvarez.
Secretaria Nacional de CIG-SAÚDE

CIG-SAÚDE gaña as eleccións sindicais no SERGAS

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

Grazas

 

Histórico resultado da CIG-Saúde nas eleccións sindicais do SERGAS consolidándose como primeira forza

Incrementa a súa representación pasando de 57 a 66 delegadas/os

A CIG-Saúde vén de reforzar a súa posición como primeira forza nas eleccións sindicais celebradas este xoves no SERGAS, aumentando en votos en todas as áreas sanitarias e incrementando a súa representación ao pasar de 57 a 66 delegadas e delegados. Un resultado histórico co que a central sindical consolida a súa hexemonía na mesa sectorial da que, ademais, quedan fóra os sindicatos médicos corporativos.

Captura EESS 2019

A secretaria nacional, María Xosé Abuín, valora moi positivamente os resultados que considera consecuencia do traballo desenvolvido durante estes anos; da súa defensa inquebrantábel da sanidade pública; do seu combate constante contra as políticas do Partido Popular, que recortou os orzamentos provocando un grave deterioro non só das condicións laborais, senón tamén do propio servizo e impuxo unhas taxas de reposición que derivaron nunha grave falta de persoal. Unha situación que foron paliando as e os profesionais a custo de incrementar a súa carga de traballo para garantir a maior calidade na atención das e dos doentes.

Enfrontar a precariedade na sanidade pública

A CIG-Saúde leva anos alertando das graves consecuencias que a precariedade laboral ten na sanidade pública. Afecta directamente ao persoal que a sofre, porque se ve obrigado a sobrevivir con contratos por días ou por horas, cunha mobilidade e rotación constante por distintos servizos. Unhas condicións laborais que impiden ter un proxecto de vida, porque están a expensas de ser chamados para unha nova contratación.

Mais esta precariedade laboral tamén ten consecuencias no persoal fixo, porque ao non se dar cobertura a todas as ausencias aumenta a súa carga de traballo, provoca desprazamentos dentro dos hospitais, dun servizo a outro, e dificulta o seu traballo.

Tanto a rotación do persoal eventual, como os desprazamentos do persoal fixo teñen tamén consecuencias para o conxunto da poboación, usuarios e usuarias da sanidade pública. María Xosé Abuín, secretaria nacional de CIG-Saúde, denuncia que se racha a continuidade asistencial “porque te atende persoal de atención primaria, facultativos de familia ou persoal de enfermería diferentes cada día” e matiza que “afecta especialmente á atención primaria onde a falta de persoal provoca non só sobresaturación e listas de agarda, senón tamén impide que se realicen tarefas propias como atención domiciliaria ou traballos na comunidade importantes”.

Por todo iso a CIG-Saúde avoga por un sindicalismo forte que defenda non só os dereitos das traballadoras e traballadores, senón tamén os intereses das galegas e galegos e, para iso, comprométese a seguir combatendo a precariedade, as taxas de reposición, os recortes impostos polo PP e a súa política de privatizacións. Unha loita que continuará, agora co respaldo reforzado do persoal, ao que agradece que teña depositado novamente a súa confianza na organización sindical.

Dia Mundial de Prevención do Suicidio 2018

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

 

20180910 imaxe cabeceira

10 de setembro: Día Mundial de Prevención do Suicidio
En Galicia, a morte por suicidio é “un problema de saúde pública de primeira orde” e ha de ser unha “prioridade multisectorial”. Estas son as palabras da Consellería de Sanidade cando o ano pasado deu a coñecer publicamente o Plan de Prevención do Suicidio para Galicia que durante anos lle reclamamos, para que así dera cumprimento ás decisións adoptadas na 66ª Asamblea Mundial da Saúde de 2013 e ás orientacións da OMS. Facémolas nosas.
Levamos un ano de plan. A taxa de mortandade en Galicia por suicidio no ano pasado sitúase en case 12 persoas (11,9) cada 100.000 habitantes. Seguimos a case unha morte diaria por
esta causa. Un ano de Plan que naceu, e así continua, sen compromisos de execución, sen responsables da súa materialización, sen dotacións económicas nin profesionais, sen prazos,
sen concrecións de actuación. Un Plan de papel. Foi un ano sen accións significativas de prevención como para que merezan tal nome, continuándose tan só coas escasas actuacións
que xa se viñan desenvolvendo na actividade ordinaria do SERGAS.
Neste tempo tivemos que denunciar en dúas ocasións as mortes de persoas por esta causa en espazos sanitarios, nos que constatamos que nin nestes lugares se implantaran programas e
protocolos de prevención.
É desesperante a desidia dos responsables da saúde da nosa comunidade. É indignante a utilización política e propagandística que fixeron do que debera ser un plan de protección da
saúde e da vida.
Debemos seguir a esixir o cumprimento das obrigas que a Xunta ten coa prevención. E tamén asumir todas e todos nós o compromiso coa mesma: confrontando o estigma, dando visibilidade a unha causa de morte con efectos tan graves, apoiando a quen se atopa en condición máis vulnerable, construíndo unha sociedade máis xusta e solidaria.
O vindeiro dia 10, en todo o Mundo, realizaranse accións con motivo do Día Mundial de Prevención do Suicidio. Ha de ser un día de sentimento por mortes evitables, denuncia da pasividade dos gobernantes e reivindicación de medios, accións e compromisos.
Nós convocámoste ao acto simbólico das Badaladas pola Prevención do Suicidio que dará comenzo ás 8 da tarde na Praza de Praterías en Santiago.
En Santiago de Compostela a 7 de setembro de 2018
MOVEMENTO GALEGO DA SAÚDE MENTAL

SOS Sanidade Pública chama a mobilización contra a privatización e desmantelamento da Sanidade Pública

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

2018-06-11 SOS Sanidade PublicaConvoca concentracións en distintas áreas sanitarias para este mércores día 13 de xuño ás 20:00 horas.

A Plataforma SOS Sanidade Pública denunciou onte pola tarde, en rolda de prensa, a estratexia global para desmantelar e privatizar a sanidade pública de Núñez Feijóo e o seu goberno. Unha estratexia que pasa por poñer a sanidade pública galega en mans de empresas privadas multinacionais e para a que a consellaría de Sanidade pretende agora cambiar o modelo de concertación ampliando e consolidando a concertación de servizos asistenciais por un período de catro anos con empresas multinacionais que están desembarcando masivamente en Galiza atraídas polo negocio sanitario.

Por iso a plataforma chama a mobilizarse este mércores, día 13 de xuño, ás 20:00 horas, baixo o lema “Acabemos coa corrupción sanitaria do PP” en:

- A Mariña: diante do Hospital da Costa

- A Coruña: no Obelisco

- Santiago: Praza do Toural

- Barbanza: Praza do concello de Ribeira

- Pontevedra: na Peregrina

- Vigo: Fronte o Marco (Rúa Príncipe)

O portavoz da plataforma, Manuel Martín, explicou que xunto cos recortes emprendidos polo goberno de Feijóo á fronte da Xunta de Galiza puxéronse en marcha un conxunto de medidas destinadas a “favorecer a multinacionais e persoas afíns”. Medidas que supuxeron a desviación de cartos públicos que debían ter sido destinados a financiar a sanidade pública e que provocaron “un incremento da corrupción”.

Martín sinalou, a modo de exemplo, a privatización de recursos fundamentais para a xestión como a información, a historia clínica electrónica ou a cita previa, que se concesionou a Indra; a privatización do Laboratorio central de Galiza; a creación da área de corazón, que se adxudicou a MEDTRONIC ou a asignación do Centro Oncolóxico a Asociación española contra o Cancro, na que están Caixa Bank e Acciona, entre outras.

Isto supuxo, segundo o portavoz de SOS, que se trasladaran inxentes cantidades de cartos públicos a estas empresas que, subliñou, manexan datos sensíbeis de doentes que deberan ser confidenciais.

Privatización da investigación

Xunto a isto denunciou a posta en marcha de medidas de apoio a fundacións como a Ramón Domínguez, para xestionar a investigación biomédica, na que están multinacionais farmacéuticas ou do Clúster de Galiza, onde participa a industria alimentaria e empresas como Pescanova.

Sinalou tamén a participación de multinacionais farmacéuticas na Fundación Xenómica ou a xestión de recursos de alta tecnoloxía do novo hospital de Vigo por parte de Galaria (a antiga MEDTEC).

Ademais denunciou que “houbo unha serie de decisións dirixidas a trasladar ao sistema privado, sobre todo, a Investigación, o desenvolvemento e a formación do persoal” e chamou especialmente a atención sobre a derivación de cartos públicos a esas multinacionais farmacéuticas que “fan investigación que se proba no sistema público e que se sae ben logo patentan e venden esas empresas privadas”.

Concertos sanitarios ampliados a catro anos

Toda unha serie de cuestións que supoñen para SOS Sanidade Pública “unha penetración do sistema privado impresionante” que vén agravarse coas últimas medidas postas en marcha: a Reforma da Lei Galega de Saúde, que consolida un modelo que ningunea a Primaria, suprime áreas sanitarias e centraliza a planificación e xestión nos hospitais de referencia e o acordo marco polo que se reforzan os concertos sanitarios coa sanidade privada.

A este respecto Martín lembrou que, até o de agora, o papel dos centros privados tiña un carácter complementario e subsidiario e que con eles se concertaban patoloxías menores como cataratas ou varices co obxectivo de alixeirar as listas de espera.

Porén, denunciou que co novo modelo pásase a concertar con empresas privadas, por un período de catro anos actividades de consulta, cirurxía, probas diagnósticas e terapéuticas  e mesmo hemodiálise. Un transvase de actividade asistencial que ascende, no caso da Coruña, a un total de 97,5 millóns de euros, co agravante de que o persoal facultativo público deberá ir a estes centros privados.

Isto supón “a privatización da bata branca, que Feijóo dixo que nunca faría”  e enormes beneficios para o negocio de empresas sanitarias privadas como Quirón, HM Hospitais ou, no caso da Coruña, o Hospital San Rafael.

Unha situación que para SOS Sanidade Pública é inadmisíbel e pola que chamaron á poboación a mobilizarse contra o desmantelamento e privatización, a pasos axigantados, do sistema sanitario público, mais tamén contra a corrupción sanitaria do PP pagada co diñeiro de toda a cidadanía galega.

Ver nova en Avantar.

V Xornada do Movemento Galego da Saúde Mental

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo
 
MGSM
 
En Santiago o 2 de xuño de 2018
Salón de actos da Facultade de Psicoloxía da Universidade de Santiago de Compostela (Campus Sur)
Horario:
9.00-Recepción de asistentes.
 
9.30-Presentación e apertura da actividade da Xornada.
Rosa Cerqueiro Landín.
Psicóloga Clínica. USM. EOXI Ferrol.
 
9.45- Mesa 1: Carta de dereitos das persoas usuarias dos servizos de saúde mental.
Coordina: Benito López-de Abajo Rodriguez.
  • Presentación da carta de dereitos: metodoloxía e obxetivos.
Benito López-de Abajo Rodriguez.
Médico Forense. Xefe de Servicio de Clínica do Instituto de Medicina Legal de Galicia.
  • Os dereitos das persoas usuarias dos servizos de saúde mental.
Miguel Vieito Villar.
Xurista especializado en Dereito Sanitario e investigador en Dereito.
  • Recomendacións e propostas
Fuencisla Ladrón de Cegama.
Fiscal da Fiscalía da Área de Santiago de Compostela.
 
11.15- Descanso.
 
11.45- Mesa 2: Mulleres e Saúde Mental.
Coordina: Delia Guitián Rodríguez.
Psicóloga Clínica. USM Lugo.
  • A saúde (mental) desde a perspectiva de xénero. Cara a un modelo asistencial saudable.
Rosa Cerqueiro Landín.
Psicóloga Clínica. USM. EOXI Ferrol.
  • Diversidade psíquica e dereitos: unha achega crítica feminista.
Paula Tomé.
Activista polos dereitos das persoas con diversidade psíquica. Mestrado en Educación, Xénero, Igualdade.
  • Xénero e saúde mental... Saúde mental e xénero?.
Lola Ferreiro Díaz.
Médica. Feminista.
 
13.15- Descanso.
 
13.30- Asamblea do MGSM.
  • Informe de actividade.
  • Elección da Coordinadora e Portavoz.
_____________________________________________________________________
  • Para participar só debes inscribirte enviando correo a esta dirección: 

mgsaudemental@gmail.com

  • A inscripción é gratuita. O número de inscripcións só se verá limitado pola capacidade de aforo do salón de actos, e darase prioridade por orden de inscripción.
 

 
 
 
 
 
 
 
 

rss queremos-galego FUNDmonchoREBOIRAS

1leftarrow-icone-5226-48

 

Confederación Intersindical Galega - Federación de Saúde
Miguel F. Caaveiro, 10 - Santiago de Compostela 
Telf 981 55 28 26 - Fax 981 57 10 82
executiva@cig-saude.info - secretarianacional@cig-saude.info - saudelaboral@cig-saude.info

2uparrow-icone-4301-48 1rightarrow-icone-9847-48

Este sitio utiliza cookies propias e de terceiros para mellorar a experiencia dos e das usuarias. Máis información sobre as cookies, o seu uso, modificación ou eliminación en política de cookies.
Se estás de acordo, preme este botón: Acepto