Noticias Sanidade Pública
 
 

Deitadas e deitados no chan para protestar polo peche de camas nos hospitais durante o verán

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo
As organizacións sindicais denuncian a “folla de ruta” da Xunta do PP “encamiñada a privatizar e desmantelar a sanidade pública”
.
Deitadas e deitados no chan pola falta de camas nos hospitais. Con esta imaxe as organizacións sindicais querían denunciar este mércores as consecuencias que vai ter o maior peche de camas decretado nunca polo Sergas para os meses do verán, que mesmo afectará a unidades enteiras nos hospitais. E por se non fose abondo, a Consellaría vai pechar tamén axendas de Atención Primaria. Todo isto provocará un grave deterioro da calidade asistencial, con colapsos dos servizos de urxencias e un grande aumento das listas de espera, ademais dun maior paro no sector sanitario.

Galería de imaxes

Estes últimos cinco anos, do 2009 ao 2014, foron os mais negros para a Sanidade Pública Galega, imperando recortes, copagamentos, continuas privatizacións de centros sanitarios e eliminación de postos de traballo, “co único obxectivo de poñer a Sanidade Pública ao servizo dos que buscan o negocio a conta de empeorar a saúde e a calidade de vida da cidadanía”. Esta é a denuncia que as organizacións sindicais con representación no ámbito da sanidade (CCOO, CESM-OMEGA, CIG, CSI-F, SAE e UGT) querían transmitir este mércores coas “concentracións deitadas” que se realizaron de xeito simultánea nas distintas áreas sanitarias do país.

En Santiago de Compostela está convocada unha concentración para mañá, xoves 15, ás 11:00 horas na entrada principal do CHUS.

Na folla de ruta do desmantelamento da sanidade

“A Xunta de Galiza de Feijóo e Mosquera ten na súa folla de ruta desmantelar a sanidade pública e dedícase a privatizar servizo a servizo (tecnoloxía, plataforma loxística, esterilización) e, agora co decreto de xestión clínica, pretenden que sexan as/os profesionais quen recorten as prestacións dos/as usuarios/as, constituíndo microempresas que a medio prazo poidan ser privatizadas”, denuncian no folleto repartido entre os/as usuarios/as. Cada ano os orzamentos en sanidade redúcense drasticamente co obxectivo de recortar as prestacións sanitarias. En contraprestación os copagamentos sanitarios incrementáronse nun 260%, supoñendo un imposto sobre a enfermidade das persoas con menos recursos.

Neste senso, a Secretaria Nacional da CIG-Saúde, María Xosé Abuín, subliña que “todas as medidas que se están a tomar desde o goberno do PP están encamiñadas á privatización e desmantelamento da Sanidade Pública, a entregala ás mans dos lobbys sanitarios, dos que, por certo, moitos Xerentes e até a propia Conselleira forman parte". Indicou que "nos servizos privatizados até agora son múltiples as deficiencias que vimos denunciando, polo que o argumento de que a privatización se fai por aforro e por mellorar a prestación, cae polo seu propio peso. Nunca presentaron un informe económico no que se recollera o tal aforro do que falan".

O maior peche de camas e a maior lista de agarda

Durante as protestas alertouse que o anuncio do maior peche de camas da historia en todos os hospitais de Galiza faise mentres padecemos unhas listas de espera “tamén históricas”, que segundo o SERGAS son de 38.106 persoas. Dato oficial que pretende pintar a realidade, xa que ocultan a espera non estrutural. Segundo confirmaron as centrais sindicais, as cifras reais que figuran hoxe no rexistro de espera de Galiza superan as 60.000 persoas. Centos destes/as pacientes levan máis de 5 anos agardando unha intervención cirúrxica.

A este respecto, indican que se poderían aproveitar os meses do verán empregando os quirófanos para alixeirar a lista de espera mais, polo contrario, a Xunta acorda pechar a metade deles.

Dende a CIG-Saúde témese ademais que, tal e como ten acontecido noutros anos, a Xunta non aproveite este peche para afondar no recorte de servizos e volva reabrir as unidades e camas. Unha situación que empeoraría considerabelmente a atención sanitaria.

Garantir o sistema público

Fronte a este ataque sistemático dende os gobernos do PP, as organizacións sindicais demandan que se blinde a sanidade pública contra das privatizacións e un compromiso firme e verídico dos gobernos na defensa do sistema público,, deseñando plans de choque para rematar coas listas de espera, empregando todos os recursos, poñendo a funcionar mañá e tarde os quirófanos e servizos centrais: laboratorios, raios, consultas, etc., dotándoos do persoal necesario para o seu funcionamento e cubrindo as xubilacións. “En definitiva, creando emprego e non destruíndoo a pasos axigantados”.

“Até o de agora, e co esforzo de todas e todos as/os profesionais do Sistema Sanitario Público en Galiza contábamos cun dos mellores servizos de saúde. Feijóo e Mosquera érguense en defensores/as da Sanidade Pública mentres participan no "lobby sanitario" SEDISA, xunto coa industria farmacéutica e empresas privadas. Estes son os compañeiros/as de viaxe que marcan a folla de ruta da Consellería de Sanidade e da Xunta”.

 

A nova en Avantar

Concentracións contra o peche de camas

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

Durante os meses de verán vanse pechar centos de camas e mesmo unidades enteiras nos hospitais. Do mesmo xeito, o SERGAS vai pechar axendas de Atención Primaria. Todo isto vai provocar un grave deterioro da calidade asistencial, con colapsos dos servizos de urxencias e un grande aumento das listas de espera, ademais dun maior paro no sector.

Non podemos consentilo!

Concentracións (deitadas) que se van celebrar nos distintos centros contra o maior peche de camas da historia do SERGAS:

 Captura

Día 14 de maio:

VIGO: ás 11h na entrada principal do Hospital Xeral

LUGO: ás 11:30h na entrada do HULA

FERROL: ás 11h na entrada principal do Hospital Arquitecto Marcide

PONTEVEDRA: ás 12h no Hospital Provincial

BURELA: ás 12h na entrada do Hospital da Costa

OURENSE: ás 11h porta principal do CHOU

O BARCO: ás 13:30h na entrada do HCV

A CORUÑA: ás 11h na rotonda do Hospital da Coruña

RIBEIRA: ás 11:30h na entrada do Hospital da Barbanza

MONFORTE: ás 12h na entrada do Hospital Comarcal de Monforte

VILAGARCÍA: ás 12h na entrada do Hospital do Salnés


Día 15 de maio:

SANTIAGO: ás 11:30h na entrada principal do CHUS

Galiza mobilízase en defensa da sanidade pública, gratuíta e universal

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo
Miles de persoas toman as rúas de cidades e vilas galegas contra as políticas privatizadoras do PP
.
Miles de galegos e galegas saíron á rúa, atendendo á chamada da Plataforma Sindical da Saúde, conformada por CIG, CCOO, UGT, C-SIF, CESM e OMEGA, nas cidades e vilas do país para defender a sanidade pública, denunciar as políticas privatizadoras do Partido Popular e exixir que se preserve a gratuidade e o carácter público e universal do noso sistema sanitario.

Galería de imaxes

Cun total de 11 manifestacións e 2 concentracións, persoal sanitario e miles de usuarias e usuarios percorreron as principais rúas das cidades e vilas galegas en todas as áreas sanitarias para denunciar o desmantelamento da sanidade pública e exixir outras políticas que preserven o seu carácter gratuíto e universal.

Estas mobilizacións son, para María Xosé Abuín, secretaria nacional de CIG-Saúde, “a demostración do malestar que hai entre a cidadanía por mor das políticas do “Partido Popular” e constatan que as galegas e galegos “non imos consentir que se venda a sanidade pública para beneficio das súas empresas amigas, deixando a unha grande maioría da poboación sen máis prestacións que as básicas a medida que se poñan en marcha os procesos de privatización”.

Abuín alertou de que coas políticas de recorte e de privatización as empresas da sanidade privada atenderán aquelas patoloxías que máis beneficios lles garantan e derivarán á sanidade pública as máis custosas provocando maior demora na súa prestación”.

Isto terá como consecuencia, segundo a secretaria nacional de CIG-Saúde, unha prestación sanitaria de calidade para quen poida pagala e unha sanidade de beneficencia para quen non teña os recursos necesarios, que son a maioría das galegas e galegos.

Manifesto

Ao remate das mobilizacións deuse lectura a un manifesto no que se denuncia que coa chegada de Feijóo á Xunta, o Partido Popular iniciou unha campaña de recortes, desmantelamento e privatizacións da Sanidade Pública, pretendendo que a sanidade “sexa un privilexio, accesible a quen o poida costear a través dos repagos que tratan de impor. Ou acudindo á sanidade privada, adiantando os cartos que despois o SERGAS reintregará”.

Subliñaron que a sanidade é unha necesidade e un dereito e que “ante a enfermidade, precisamos duns servizos sanitarios que nos axuden a mellorar, a sobrelevar a debilidade que nos produce, a sandar”. Para garantir isto demandaron uns servizos sanitarios que atendan a todos e todas “por igual, sen discriminacións nin desigualdades”, o que entenden que só se garante cunha sanidade pública.

Lembraron que despois de múltiples manifestacións cidadás, este mércores houbo que saír novamente ás rúas porque “este goberno segue a facer oídos xordos ás nosas demandas en defensa da Sanidade Pública” e denunciaron que, desde hai un tempo estase a desmontar a Sanidade Pública e “xa non podemos acceder con equidade ao sistema sanitario, incrementáronse as desigualdades de acceso en función dos nosos ingresos, da zona onde vivamos”. Unha situación que consideran que se agrava e é máis agresiva coas persoas que teñen menos recursos.

Proclamaron que a  Sanidade Pública é “patrimonio universal da cidadanía, lograda co esforzo de todos” e que por iso “non imos consentir que a privaticen, converténdoa nun nicho de negocio para empresas amigas, vendéndoa por pezas e ao mellor postor” e denunciaron que esa é a folla de ruta que teñen marcada para os servizos públicos, “eliminar a Sanidade Pública para poder facer negocio coa enfermidade das persoas”.

Lembraron as medidas máis salientábeis que afondan no desmantelamento da Sanidade Pública:

  • “Privatizacións Despois das privatizacións dos servizos non sanitarios, e de reiteradas promesas do Sr.Feijóo e da Conselleira de Sanidade, Sra.Mosquera, de que nunca ían privatizar a bata branca, agora privatizan as unidades de esterilización co argumento de que na empresa privada está a eficiencia e a eficacia e o coñecemento da alta tecnoloxía.
  • Non descansan no seu intento en desprestixiar os servizos públicos. A privatización das unidades de esterilización conta coa oposición frontal de todos/as as/os profesionais, pero aos privatizadores dálles igual. Non son capaces de presentar un informe técnico que avale a súa medida, porque non existe xustificación nin profesional, nin técnica, nin económica. O  único obxectivo das empresas privadas é o lucro, non traballan para beneficio de ninguén máis que de si mesmas.
  • Implantación de copagamento nas prestacións sanitarias. Incrementando o sufrimento das persoas que non teñen recursos económicos para facerlles fronte, creando un imposto sobre a enfermidade. Fronte a esta situación a comisión de sabios do PP recomenda nun recente informe incrementar os repagos co argumento de que“a prestación gratuíta e xeneralizada dos servizos sanitarios non é o modo máis eficiente e xusto de actuar”. De que xustiza nos están a falar?
  • Peche de camas, recortes orzamentarios, taxas de reposición. Isto é o que impera na Sanidade Pública. Menos camas para ingresar os/as doentes, colapso dos servizos de urxencias. Condénase a/o doente a entrar nunha porta xiratoria entre o seu domicilio e o servizo de urxencias.Recórtase o diñeiro destinado á Sanidade Pública, destrúense postos de traballo, reducindo a presenza dos/as profesionais que fai inviable unha prestación de calidade, para logo remitir as/os doentes a centros privados.

E logo inda nos veñen con contos propagandísticos cando falan das listas de espera. As listas de espera son grandes e medran día a día, por causa dese peche de camas, pola mala xestión que se está a facer e tamén porque pensan que nos enganan mantendo persoas en listas de espera ocultas.

  • A Lei de Garantías é a expresión do fracaso das políticas sanitarias do PP.Intégrase nun mesmo nivel e nun mesmo sistema a Sanidade Pública e privada. Di o Sr.Feijóo que a prestación sanitaria recibida nun centro privado tamén é pública, xa que as/os doentes non pagan a maiores por esta asistencia.De futuro isto vai dificultar o desenvolvemento dos principios que deben presidir o sistema sanitario público.Nun informe da Comisión Europea, coñecido estes días, ponse en dúbida que a colaboración público-privada mellore a eficiencia na atención sanitaria. O que si se recolle neste informe é que resulta máis custosa (marxe de beneficios a maiores).
  • Implantación da obrigatoriedade de derivar os casos de accidentes de tráfico menos graves ás clínicas privadas, aumentando así o beneficio destas empresas a costa da nosa saúde e dos nosos petos.
  • Areas de Xestión Integradas e Áreas de Servizos Compartido, creadas co obxectivo de provocar un distanciamento do recurso sanitario ao respecto da poboación, con evidentes efectos disuasorios, e ruptura da equidade. Isto implica que, como exemplo, no sur galego un neno da comarca de Valdeorras tería que ser trasladado ata máis de 200 km de distancia para ser atendido por un cirurxián pediátrico.
  • E como inda non é suficiente, inda está enriba da mesa a proposta de Áreas de Xestión Clínica, que pretende trasladar ás persoas que traballan na Sanidade Pública, ás e aos profesionais, a responsabilidade de recortar, chantaxeándoos con incentivos ligados ao aforro”.

Neste contexto anunciaron que nin o persoal do SERGAS nin o conxunto da poboación galega “estamos dispostos/as a participar nese xogo, non cederemos á chantaxe”.  Advertiron ademais que as e os galegos xa saíron á rúa a manifestarse no pasado, volveron saír á rúa hoxe e “seguiremos a manifestarnos e a loitar pola Sanidade Pública. As/os políticos son meros xestores transitorios dos servizos públicos, non teñen ningún dereito a privatizalos, negándonos o dereito a ter unha Sanidade Pública, universal e de calidade, que logramos o noso esforzo e que se financia cos nosos impostos”.

A nova en Avantar

Chamamos á poboación e ao persoal sanitario a mobilizarse o vindeiro 26 de marzo en defensa da Sanidade Pública

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo
As manifestacións e concentracións contra as políticas sanitarias do PP terán lugar en todas as cidades e en numerosas vilas
.
Os recortes en prestacións, servizos, persoal, privatizacións e copagos, a ausencia de negociación cos sectores afectados e o deterioro na sanidade pública que isto ten provocado leva ás organizacións sindicais a convocar para o vindeiro mércores día 26 de marzo manifestacións e concentracións, máis unha vez, en todas as áreas sanitarias de Galiza. Así o anunciaron CIG, CCOO, UGT, C-SIF, CESM e OMEGA este venres na rolda de prensa na que fixeron un chamamento a participar a todas/os profesionais da sanidade pública e á poboación no seu conxunto, en defensa da sanidade pública, gratuíta e universal.
13-03-21 RP Plataforma sindical saude 001
“A sanidade pública é patrimonio de todos os galegos e galegas. O Partido Popular é un simple xestor transitorio e non ten dereito a vendela aos seus amigos. Exiximos que mude a súa política sanitaria que só ten servido para provocar un empeoramento da calidade asistencial, recortar os recursos e provocar sufrimento nas usuarias e usuarios”.

Con esta contundencia se manifestaba, ao comezo da rolda de prensa, a secretaria nacional da CIG-Saúde, María Xosé Abuín, quen lembrou que as organizacións sindicais levan meses pedindo un diálogo fluído, enviando escritos para que “esta administración cega e xorda tivese algunha sensibilidade” sen conseguir froito algún.

Ante iso e á vista de que no canto de frear esas políticas a administración o único que fixo foi “endurecelas aínda máis” Abuín asegurou que “non imos consentir que sigan incorporando repagos, como recomendan ese grupo de sabios, porque xa pagamos cos nosos impostos”.

Abuín referíase á recomendación recollida no documento que vén de presentar a comisión de expertos, no que se afirma que “a prestación gratuíta e xeneralizada de servizos esenciais como a Sanidade non é o modo máis eficiente nin xusto de actuar”. Unha recomendación ante a que alertou de que camiñamos cara unha “sanidade menos nosa, menos pública, máis cara e con menos dereitos”.

Denunciou que malia os intentos de negociar para que se muden as políticas sanitarias a consellaría incrementou a súa contundencia. Como exemplos puxo a comparecencia da conselleira de Sanidade en sede parlamentaria para explicar a privatización do servizo de esterilización, onde asegurou que a sanidade privada é máis eficiente que a pública ou a aprobación, no Consello da Xunta, do Decreto de Xestión Clínica, en pleno proceso de negociación. “Nuns anos teremos un sistema sanitario irrecoñecíbel”, asegurou.

Xunto a ela estaban as/os representantes das outras organizacións sindicais que conforman a Plataforma Sindical da Saúde, que contrapuxeron ás afirmacións da conselleira o Informe Bloomberg, elaborado por unha axencia estadounidense co mesmo nome, no que se considera o sistema sanitario do estado español como o 5º máis eficiente do mundo e o informe da Comisión Europea no que se pon en cuestión a eficiencia da colaboración público-privada. Isto alén do que suporá para as xeracións futuras optar por este modelo de financiamento para a construción de novas infraestruturas como hospitais ou centros de saúde. “Verán hipotecados os orzamentos durante décadas para pagar as débedas derivadas deste sistema”.

Isto levounos a afirmar que a conselleira é un “troiano infeccioso” para o sistema sanitario e que coas súas políticas o PP o único que pretende é atender as presións dos lobbys da sanidade privada. De feito, aseguraron que para favorecer o sistema sanitario privado aprobouse a Lei de Garantías e o propio decreto de Xestión Clínica e advertiron de que camiñamos cara un modelo de sanidade para ricos e outro, de beneficencia, para pobres.

A respecto do decreto de Xestión Clínica anunciaron que non participarán no seu desenvolvemento e que, polo tanto, non participarán tampouco na Comisión Técnica creada ao efecto, entendendo que “negociar é solucionar conflitos” e non sentar a desenvolver as consecuencias “negativas e perversas” que terá.

Por todo isto fixeron un chamamento a todas/os as/os profesionais do sistema sanitario e a toda a cidadanía a saír ás rúas de Galiza o mércores 26 de marzo para reclamar unha sanidade “pública, gratuíta e universal”.

1780021_809852395710451_628125713_o

Manifestacións convocadas e horarios de saída

-A Coruña: 20 horas, da Casa do Mar

- Ferrol: 18:00 horas, de Fontenla Maristany

- Santiago: 20:00 horas, da Praza Roxa

- Ribeira: 20:00 horas do Centro de Saúde

- Pontevedra: 20:00 horas, do Hospital Provincial

- Vigo: 20:00 horas do Hospital Xeral

- Ourense: 20:00 horas, do Pavillón dos Remedios

- O Barco: 20:00 horas do Hospital Comarcal de Valdeorras

- Lugo: 20:00 horas, do Edificio Multiusos da Xunta

- Burela: 20:30 horas, do Hospital da Costa

Concentracións:

-Cee: 12:00 horas, na prota principal do Hospital Virxe da Xunqueira

- Vilagarcía: 14:00 horas, porta principal do Hospital do Salnés

- Monforte: 20:00 horas, da Praza de España

A nova en Avantar

Persoal do Sergas mobilízase nas diferentes áreas sanitarias de Galiza en defensa da sanidade pública

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo
A CIG-Saúde chama a traballadores/as e usuarios/as a participar nas manifestacións comarcais convocadas para o mércores 26 de marzo
.
Coa celebración de concentracións, esta mañá, nos centros de saúde das diferentes áreas sanitarias de Galiza culminaba a primeira semana de asembleas abertas convocadas polas organizacións sindicais CIG, CCOO, UGT, C-SIF, CESM, OMEGA. Con estas mobilizacións demandan do Sergas un xiro radical nas súas políticas sanitarias, que sente a negociar coas organizacións sindicais e a paralización da privatización do servizo de esterilización. Ante a actitude inmobilista do Sergas confirman a convocatoria de manifestacións en todas as comarcas para o vindeiro día 26 de marzo.
14-03-14 Manifestacion CHUAC

Galería de imaxes

A secretaria nacional de CIG-Saúde, María Xosé Abuín, que participou na concentración convocada no Hospital Clínico, na Área Sanitaria de Santiago,  explicou que con estas mobilizacións o persoal da sanidade pública manifesta a súa disconformidade coas políticas privatizadoras emprendidas polo PP e a súa disposición a plantarse diante do desmantelamento e descapitalización da sanidade pública.

Abuín acusou ao Presidente da Xunta, Alberto Núñez Feijóo de intentar manipular á opinión pública ao dicir que non se está a privatizar a sanidade porque cando unha persoa é atendida nun centro sanitario privado non vai ter que pagar. “O problema é que a sanidade pública, que se financia cos impostos de todas e todos nós si vai ter que destinar parte do seu orzamento a financiar a sanidade privada en lugar de investir eses cartos en garantir a atención na sanidade pública”.

Para a secretaria nacional de CIG-Saúde é “lamentábel” que Feijóo poña ao mesmo nivel sanidade pública e privada e que defenda que a prestación sanitaria recibida nun centro privado tamén é sanidade pública, cando o que isto significa “desmantelar a pública en beneficio da privada”.

Denunciou, xunto a isto, o incremento das partidas orzamentarias destinadas a financiar a privatización dos servizos, pagando un custe maior por eles cunha peor calidade e destruíndo ademais emprego público.

Reclamou a inmediata paralización do proceso de privatización  do servizo de esterilización e a reversión ao Sergas de todos os servizos privatizados. “Gañariamos en calidade e aforrariamos en orzamento”.

A CIG-Saúde lembra que a sanidade pública e patrimonio de todos/as os galegos/as e fai un chamamento a participar masivamente nas manifestación convocadas o vindeiro día 26 de marzo na súa defensa.

A nova en Avantar.

Tod@s xunt@s podemos. A razón lexitímanos para defender a Sanidade Pública

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

Ante as agresións continuadas e reiteradas que tanto á Sanidade Pública como as/os súas/seus traballadoras/es estamos a sufrir nas prestacións sanitarias e nas nosas condicións laborais, é necesario dar unha resposta unitaria e contundente, para que o goberno galego, dunha vez por todas, escoite as nosas demandas, reconduza a política sanitaria, paralice as privatizacións, e negocie coas organizacións sindicais, entre outros temas, o decreto de xestión clínica.
As privatizacións das distintas áreas ou servizos sanitarios e non sanitarios aféctanos a todas/os:

  • Como usuarias/os da sanidade, pola perda de calidade deste servizo, pola descapitalización do sistema sanitario público, e polo encarecemento do servizo polo lucro que a empresa privada vai percibir.
  • Como traballadoras/es polo aumento da precariedade laboral, polo empeoramento das condicións de traballo, pola destrución de emprego público.
  • Como cidadanía deste País: non podemos consentir que se privaticen servizos para que co diñeiro público se enriquezan cada día máis os mesmos a cambio de condenar as/os traballadoras/es a ter salarios miserábeis. Non podemos permitir nin tampouco contribuír ao empobrecemento das/ostraballadoras/es e á ineficiencia no gasto público.

A Admón. e o Goberno enganáronnos coas súas mentiras: dixeron que “nunca ían privatizar a bata branca”. Xa tiñamos precedentes de privatización de varios servizos, contra a que loitamos no seu momento, agora intentan privatizar os servizos de esterilización coa oposición de todas/os as/os profesionais afectados.


Se non o paramos, cada día irán mais lonxe. Cal será o próximo servizo en privatizar?
Captura

Asembleas, concentracións e manifestacións en defensa da Sanidade Pública

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo
As organizacións sindicais do sector non desbotan mobilizacións máis contundentes se o SERGAS publica finalmente a privatización de esterilización
.
CIG, CCOO, UGT, C-SIF, CESM, OMEGA e SAE anuncian a convocatoria de asembleas abertas en todos os centros de traballo entre os días 6 e 13 de marzo e concentracións, tamén nos centros de traballo, o venres 14. Xunto a isto aseguran que se o SERGAS non paraliza a privatización do servizo de esterilización, muda a súa política sanitaria e senta a negociar coas organizacións sindicais na mesa sectorial convocaranse manifestacións en todas as comarcas para o día 26 de marzo, ás que chaman a participar a traballadores/as e usuarios/as.

A secretaria nacional de CIG-Saúde, María Xosé Abuín explicou que as organizacións sindicais chegaron ao acordo de convocar este calendario de mobilizacións porque “non imos parar até que a administración cambie de política; non imos permitir a descapitalización da sanidade pública e non imos consentir a perda do coñecemento porque o coñecemento está na sanidade pública, así como a eficacia e a eficiencia na xestión”.

Abuín sinalou que o que está a facer o PP é fragmentar a sanidade pública en pequenas parcelas para facilitar a súa privatización. “Comezou por privatizar  os servizos non sanitarios coas consecuencias tan negativas que está a ter” explicou, e agora comeza cos de “bata branca”, denunciou. E isto malia a oposición das/os profesionais que traballan directamente no servizo, das/os de medicina preventiva, encargados de controlar a calidade dese traballo, e de todas as organizacións sindicais.

As organizacións sindicais demandan, con estas mobilizacións, que se recuperen todos os servizos de titularidade pública porque “esta administración, malia dicir que as privatizacións son boas para o sistema, en ningún momento presentou un informe que xustifique a súa medida”.

Fronte a isto si que detectaron, e así o denunciaron, que cada día hai un maior encarecemento dos servizos públicos con todos os canons a pagar dentro do orzamento de Sanidade e alertaron de que “en breve si que vai ser inviábel a prestación sanitaria porque o orzamento do SERGAS vai ter que destinar máis ao canon das privatizacións e a pagar a privatización dos hospital de Vigo que o que se destine a pagar as nóminas das traballadoras e traballadores do SERGAS para incorporar no sistema novas tecnoloxías ou para dar unha sanidade de calidade”.

A débeda do SERGAS triplicada con Feijóo

Neste sentido aseguraron que desde a chegada de Feijóo ao goberno da Xunta case se triplicou a débeda do SERGAS, que pasou dos daquela 3.600 millóns de euros aos 9.400 millóns actuais. Subliñaron que as privatizacións “xa se comen practicamente a metade dos orzamentos” do Servizo Galego de Saúde e denunciaron que o que se está a facer é “hipotecar o futuro da sanidade pública”.

Lembraron que o propio Consello de Contas dixo que os gastos na xestión privada se dispararon un 100% respecto á pública, achacábel a un aumento das exploracións, e que, desde 2009, se privatizou a construción do hospital de Vigo, os plans directores dos complexos hospitalarios de Ourense e do Salnés, a central telefónica de cita previa,  a alta tecnoloxía diagnóstica e terapéutica, o mantemento de equipos a plataforma loxística de medicamentos, o arquivo de historias clínicas a atención so accidentados leves d e tráfico, as telecomunicacións e agora están a piques de facer o mesmo co servizo de esterilización.

A respecto da plataforma loxística do SERGAS chamaron a atención a respecto de que a adxudicataria era unha empresa familiar de mudanzas que, desde aquela, pasou de ser unha pequena empresa a empregar agora a 156 traballadores/as “o que significa que é un negocio moi importante” e preguntáronse por que o SERGAS “non destina eses beneficios, en lugar de a unha empresa, a mellorar a calidade sanitaria”.

Aseguraron que as externalizacións e privatizacións “son a demostración da incapacidade manifesta para xestionar o público” e consideraron que se o actual goberno non é capaz de xestionar ten que marchar.

Ante este panorama, as organizacións sindicais aseguraron que hai que frear estas políticas de desmantelamento da sanidade pública. Un desmantelamento que entenden que está planificado e do que é boa proba que en maio de 2013 o Director de Recursos Económicos do SERGAS, Pablo Torres Arrojo, participara nunhas xornadas en Cartaxena cunha ponencia baixo o título “Modelo do SERGAS de externalización da esterilización”.

En todo caso, subliñaron que a privatización de esterilización é o paso seguinte ás áreas de xestión clínica que, lembraron, “dixeron que ían publicar e que seguen a dicir que van publicar pero aínda non o fixeron e que se non hai acordo cos profesionais están abocadas ao fracaso”.

Por iso reiteraron o seu chamamento a todo o persoal do SERGAS, mais tamén á poboación no seu conxunto, a paralizar estas políticas e defender a sanidade pública, única que garante a atención sanitaria gratuíta e universal.

A nova en Avantar

 
 
 
 
 
 
 
 

rss queremos-galego FUNDmonchoREBOIRAS

1leftarrow-icone-5226-48

 

Confederación Intersindical Galega - Federación de Saúde
Miguel F. Caaveiro, 10 - Santiago de Compostela 
Telf 981 55 28 26 - Fax 981 57 10 82
executiva@cig-saude.info - secretarianacional@cig-saude.info - saudelaboral@cig-saude.info

2uparrow-icone-4301-48 1rightarrow-icone-9847-48

Este sitio utiliza cookies propias e de terceiros para mellorar a experiencia dos e das usuarias. Máis información sobre as cookies, o seu uso, modificación ou eliminación en política de cookies.
Se estás de acordo, preme este botón: Acepto