Noticias Outras novas
 
 

CIG-Saúde denuncia a dobre penalización salarial do persoal do SERGAS nos meses de xullo e decembro

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

Nin no salario nin na paga extraordinaria cobran o complemento específico que correspondería

A CIG-Saúde denuncia que nos meses de xullo e decembro o persoal do SERGAS sofre unha dobre penalización salarial no seu complemento específico ao incumprirse os acordos salariais asinados en 2008, co goberno bipartito, que foron conxelados polo goberno do PP coa chegada de Feijóo á Xunta de Galiza.

O complemento específico retribúe as especificidades do posto de traballo atendendo á  dificultade técnica, dedicación, responsabilidade, perigosidade  e penosidade, tal e como se establece no artigo 43.2 do Estatuto Marco.

A secretaria nacional de CIG-Saúde, María Xosé Abuín incide en que é a Xunta de Galiza quen ten as competencias para negociar a súa contía. Porén, denuncia que o goberno do PP penaliza o persoal estatutario de SERGAS, que ten un complemento específico inferior que o resto das/os traballadoras/es da Xunta de Galiza.

 

Abuín lembra que co goberno bipartito asinárase en 2008 un acordo retributivo que contemplaba unha suba salarial para que o persoal do SERGAS puidera superar “o agravio histórico” que viña padecendo.

A secretaria nacional de CIG-Saúde denuncia que porén, en canto Alberto Núñez Feijóo accedeu á presidencia da Xunta de Galiza no ano 2009, “o primeiro que fixo foi suspender, entre outros, este acordo” que se mantén desde aquela conxelado e que se nega a negociar na mesa sectorial, tal e como veñen demandando desde que o propio presidente da Xunta se subiu un 7,5% o seu salario.

Abuín denuncia, ante isto, que “o goberno do PP segue a condenar ao persoal do SERGAS a ter unha retribucións inferiores ao resto das/os traballadoras/es da Administración Pública Galega, mentres Feijóo presume de que as/os traballadoras/es da Xunta de Galiza no ano 2017, e desde o mes de xaneiro, recuperaron parte do salario que eles veñen roubando desde o 2010”.

Perda acumulada

Na extra do mes de xullo devolveuse o complemento específico “roubado” desde o ano 2012, pero sen os incrementos que se deberían aplicar atendendo ao acordo retributivo que o Sergas incumpre. No seguinte cadro pódese comprobar “o que nos rouban nas extras e mes a mes”, afirma María Xosé Abuín:

Especifico  Persoal Xunta de Galiza

Especifico Persoal do SERGAS

Roubado ao persoal do SERGAS mes a mes, e nas pagas extras

Nivel 22

626.99 €

Grupo A2

392.70 €

234.29 €

Nivel 18

465.15 €

Grupo C1

273.81 €

191.34 €

Nivel 16

451.34 €

Grupo C2

278.84 €

172.50 €

Nivel 12

423.71 €

Grupo E

306.36 €

117.35 €

 

Ver noticia en Avantar

Descarga aquí o noso panfleto

20170703FEIJOO-Paga-extra-xullo-2017 3

CIG-Área Pública rexeita os orzamentos estatais "que non garanten nin dereitos nin servizos"

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

 

CIG-Área Pública rexeita os orzamentos estatais "que non garanten nin dereitos nin servizos"

 

Delegadas e delegados da Área Pública da CIG (Federacións de Administración, Ensino e Saúde) realizaron unha concentración este mércores diante da Delegación do Goberno na Coruña, para reafirmar o rexeitamento aos orzamentos estatais que veñen de ser aprobados e que "non contemplan a reposición de dereitos roubados aos empregados/as públicos nin a recuperación do emprego e, pola contra, afondan no desmantelamento dos servizos públicos".

Pero con esta mobilización tamén se quere ratificar a oposición ao "Acordo para a mellora do emprego público" asinado por CCOO, UGT e CSIF en Madrid no ámbito das administracións públicas, cuxa parte dispositiva  non vai máis alá "dun lavado de cara para o Partido Popular", ante o incremento das taxas de precariedade no emprego público e as reiteradas sentenzas xudiciais que cuestionan as taxas de reposición impostas nos últimos anos a través da lexislación básica estatal.

 

Santamariña destacou que este acordo non só non elimina as taxas de reposición (que se manteñen na Lei de Orzamentos do estado para 2017 nun 50% con carácter xeral e no 100% para servizos esenciais), senón que se consolidan "agora co parabén dos sindicatos estatais". A limitación nas taxas de reposición, engadiu, "son a causa principal da extensión da precariedade nas administracións públicas". Unha precariedade da que López Santamariña responsabilizou “á política destrutiva” do PP e que afecta a entre un 30 e un 40% do seu cadro de persoal.

Imposibilidade de crear de novas prazas

Neste senso, explicou que o único que se recolle nese acordo é a posibilidade de incluír nas ofertas de emprego as prazas estruturais vacantes ou con sentenzas de indefinidos non fixos xa existentes nos cadros de persoal, pero non posibilita a creación de novas prazas en ningunha das administracións. "O acordo asinado por CCOO, UGT e CSIF supón unha renuncia expresa a recuperar todo o emprego público perdido durante estes anos e a incorporar prazas estruturais que permitan recuperar a prestación directa de servizos esenciais que foron privatizados", advertiu Santamariña.

"En realidade, continuou, estes sindicatos estanlle dando un balón de osíxeno aos gobernos para regularizar os cadros de persoal, dotando supostamente de estabilidade aos postos de traballo que na realidade xa están ocupados. Pois o acordo non leva parello dotación económica, nin abre a vía para que se derroguen ou modifiquen os decretos lei que nos impuxeron ao longo destes anos e que impedían dotar as administracións públicas dos recursos humanos que precisan".

Non se recuperan os dereitos roubados.

Xunto a isto, dende a CIG-Área Pública denuncian que ese publicitado acordo tampouco contempla a recuperación dos dereitos laborais suprimidos nin das condicións salariais recortadas, iniciadas polo goberno de Zapatero en 2010 cunha rebaixa do 5% da masa salarial e que seguiron recortando tanto o goberno de Mariano Rajoy como de Feijoo na Xunta de Galiza. "Nada se di no acordo da recuperación do poder adquisitivo (nos Orzamentos estatais só se contempla un incremento do 1% para este ano), nin da recuperación dos fondos de acción social, nin da volta á xornada laboral anterior, nin tampouco da recuperación do complemento do 100% nos casos de IT", censuran.

A este respecto, a voceira da Área Pública da CIG, valorou que o principal interese do goberno español por acadar ese pacto "é solucionar o problema que teñen as administracións públicas coas numerosas sentenzas que declaran a fraude de lei nas contratacións temporais". Unhas resolucións que a xurisprudencia do contencioso administrativo está  estender ao persoal funcionario interino, fixando incluso indemnizacións por despedimentos semellantes aos da xurisdición social, a causa da transposición das directivas da UE.

"Con este acordo, o goberno dálle forma de pacto cos sindicatos ao que en realidade é un imperativo legal para non ter que chegar a pagar indemnizacións", sinalan.

Xestión pública do Plan de Pensións da Administración Xeral

Nun momento no que se está cuestionando a viabilidade do sistema público de pensións e que se prevé que o PP tente meter un novo retallo nas pensións nos vindeiros meses, a CIG volveu demandar que se mude a xestión privada do Plan de Pensións da Administración Xeral do Estado e que pase a ser de xestión pública.

"Que este fondo, que se nutre basicamente coas achegas que se detraen dos incrementos retributivos estabelecidos nos Orzamentos do Estado para o persoal da Administración, estea depositado e sexa de xestión pública, ofrece maiores garantías e ademais, supón que os beneficios da xestión revertan nos ingresos patrimoniais das arcas públicas", explicou Santamariña.

A noticia en Avantar.

A PLATAFORMA SINDICAL ESIXIMOS NEGOCIAR UN CALENDARIO PARA RECUPERAR OS ACORDOS

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

foto web peq

ENTendeMOS que se hai mellora económica, como di o PP, tamén ten que repercutir no persoal do Sergas

Delegados e delegadas das organizacións sindicais de Saúde CIG, CCOO, UGT, CSIF, SATSE e SAE concentrámonos este martes, diante do edificio do Sergas en San Lázaro, coincidindo coa entrega de sinaturas recollidas entre o persoal do Servizo galego de Saúde para instar ao conselleiro de Sanidade a convocar a mesa sectorial e negociar un calendario de recuperación dos acordos –retributivos, de condicións de traballo e carreira profesional- suspendidos desde o ano 2009.

A secretaria nacional de CIG-Saúde lembrou que estes acordos teñen rango de norma xa que foron publicados no DOG e “non poden estar suspendidos indefinidamente por decisión unilateral da administración”, máxime cando noutros ámbitos da administración pública si se están asinando acordos de equiparación salarial.

Para Abuín, se hai recuperación económica, como di o PP, “esta debería permitir recuperar as condicións económicas e laborais de todas as traballadoras e traballadores da administración pública”.

Xunto a isto denunciou que o goberno do PP si que se aplicou esa recuperación económica porque no ano 2012, coa Lei de Medidas, detraeu un 3% do salario dopresidente e dos conselleiros/as e este ano aprobou un incremento do 7,5% para o presidente e un 7% para os conselleiros/as, o que dá un incremento salarial real do 4,5% nun caso e do 4% no outro.

Abuín entende que o que non pode facer o conselleiro de Sanidade é eliminar as competencias da Mesa sectorial, nomeadamente a da negociación. “Levamos moito tempo solicitando que este punto se inclúa na orde do día da mesa, pero a consellaría négase de forma sistemática a abordar esta cuestión”.

O obxectivo das organizacións sindicais con esta mobilización, é desbloquear esta situación, negociar o calendario de recuperación e que no exercicio orzamentario de 2018 xa haxa unha partida destinada á recuperación destes acordos. “Por iso entendemos que este é o momento”.

Endurecemento das mobilizacións

No decurso da concentración anunciaron que continuarán coas mobilizacións e advertiron que se non obteñen resposta do Sergas para sentar a negociar as endurecerán á volta do verán. En todo caso xa teñen convocada unha manifestación para o vindeiro día 14 de xuño en Compostela.

Noticia en Avantar

Manifestación nacional pola lingua: En galego sen límites!

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

Un ano máis, a Plataforma Queremos Galego, da cal a CIG forma parte, convoca unha grande manifestación nacional en Santiago de Compostela a prol da lingua e contra os ataques e discriminacións que sufre o noso idioma e as persoas que queren vivir a súa vida plenamente en galego. Inda estes días se denunciaba unha grave discriminación por razón de lingua na sanidade, algo que, en pleno 2017 non debería acontecer, pero que si acontece e máis do que pensamos.

Queremos vivir en galego, sen límites. Por iso, convidamos a todo o mundo a participar na manifestación de Queremos Galego, que sairá da Alameda de Santiago mañá mércores 17 ás 12h.

Cartaz QG 17M-731x1024

Exiximos que se garantan os dereitos lingüísticos na Sanidade

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

 

amesa

Nas datas previas ao Día das Letras Galegas, tivemos coñecemento dunha grave discriminación lingüística na sanidade, denunciada pola Mesa pola Normalización Lingüística. Unha persoa tivo que ver atrasada unha proba diagnóstica por non dispoñer o centro privado ao que foi derivado desde o SERGAS do documento de consentimento informado en galego. Non é a primeira vez que acontece, por iso, diriximos este escrito ao Xerente do SERGAS e ao Conselleiro de Sanidade, para exixir que se garantan os dereitos lingüísticos das persoas usuarias da sanidade (preme para agrandar)

20170515 escaneado escrito discriminación lingüística

A noticia en Avantar

Atrásase unha proba diagnóstica no Juan Cardona por non facilitarse documentación en galego

CIG-Saúde denuncia a discriminación lingüística que sofren as persoas usuarias na sanidade pública galega

CIG-Saúde vén de dirixirse ao conselleiro de Sanidade, Jesús Vázquez Almuíña, e ao Xerente do Servizo Galego de Saúde, Antonio Fernández-Campa, para denunciar a discriminación lingüística sufrida por unha persoa usuaria da Sanidade Pública, que tivo que ver atrasada unha proba diagnóstica por non serlle facilitado o documento de consentimento informado en lingua galega, tal e como esta persoa requiriu, conforme ao seu dereito.

A CIG-Saúde explica que nesta ocasión, trátase da negación dun dereito a unha persoa derivada desde a Sanidade Pública a un centro concertado de Ferrol, o hospital Juan Cardona, que xa noutra ocasión negara a posibilidade de entregar a documentación en galego, é dicir, “un caso reincidente de negación de dereitos a unha persoa que está accedendo a un servizo prestado pola Administración Sanitaria Pública”. Con todo, asegura que isto non é a primeira vez que sucede, nin este é o único centro onde se ten producido.

Lembra que o artigo 3 da Lei 3/1983, do 15 de xuño, de Normalización Lingüística, estipula que “os poderes públicos de Galiza adoptarán medidas oportunas para que ninguén sexa discriminado por razóns de lingua". O artigo 6.1 da mesma lei, estabelece o dereito dos/as cidadáns/ás ao emprego do galego, tanto oralmente como por escrito, nas súas relacións coa Administración Pública. Así mesmo, e en desenvolvemento destes artigos da LNL, a Consellaría de Sanidade emitiu o 8 de novembro de 2005 as instrucións 11/2005 sobre "Emprego do galego nos documentos da Consellaría de Sanidade e do SERGAS".

Por iso insta a que, dunha vez por todas, se tomen medidas para que todos os centros dependentes desta Consellaría, e todos aqueles centros que atenden persoas derivadas da Sanidade Pública dispoñan de toda a documentación na nosa lingua propia, o galego, e garantan a non discriminación de ninguén por razón de lingua.

Exixe ademais que desde o Servizo Galego de Saúde se estabelezan as medidas oportunas para que todo o persoal dispoña das ferramentas necesarias para a garantía dos dereitos lingüísticos, tanto a nivel material como de formación, entendendo que a Administración Sanitaria Galega non pode continuar a consentir casos graves de discriminación como o que aconteceu estes días.

CIG-Saúde denuncia a “opacidade” da convocatoria de promoción “Código Camiño” da ACIS

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

20170315 escrito acis

Demanda a paralización do até recibir información sobre o mesmo e comprobar que se cumpriron os requisitos mínimos de selección do “Sector Público”

A CIG-Saúde vén de solicitar acceso á información referida á convocatoria da promoción “Código Camiño: hackaton en saúde para ideas de valor” convocada pola Axencia de Coñecemento en Saúde (ACIS). En concreto demanda a identificación nominal das persoas que formaron parte do grupo de expertos do SERGAS para seleccionar aos candidatos e candidatas; os criterios de selección e unha copia das actas das reunións nas que se tomaron as decisións ao respecto.

A solicitude (premer na imaxe para agrandar) de CIG-Saúde vén motivada polas queixas transmitidas á central sindical sobre a opacidade dos criterios de selección deste proxecto financiado con fondos públicos.

Así explica que nas bases desta convocatoria presentábase como data límite de presentación das propostas o 24 de febreiro e nese momento había 28 solicitudes de participación segundo a propia web da promoción.

A ACIS reservábase o dereito de aprazar ou modificar a duración da promoción por causas de forza maior ou alleas o seu control e así se fixo, aprazando até o 28 de febreiro. Unha decisión que, segundo a CIG-Saúde, foi adoptada “sen mediar causas de forza maior ou alleas o seu control”.

Ademais, ao remate do prazo, o total de solicitudes ascendía a 33, pero “nin na páxina da promoción, nin nas bases aclarábanse os criterios de selección dos participantes”. E non só iso, as/os concorrentes con propostas que foron desbotadas recibiron unha comunicación mediante correo electrónico “sen datar, nin asinar”.

Diante disto, a CIG-Saúde exixe a paralización do proceso até recibir información sobre o mesmo e comprobar que se cumpriron os requisitos mínimos de selección do “Sector Público”.

A CIG chama a mobilizarse, este 10 de Marzo, para derrotar as reformas e recuperar os dereitos

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

A central convoca protestas en todas as comarcas do país para conmemorar o Día da Clase Obreira Galega

Con mobilizacións en Vigo, Ferrol, Lugo, Ourense, Vilagarcía, Pontevedra, Compostela e Cee conmemorará a CIG o 10 de marzo, Día da Clase Obreira Galega. Unha data reivindicativa na que a central sindical dá continuidade á campaña posta en marcha xa no mes de decembro e que se desenvolverá baixo o lema “2017, un ano de loita. Recuperemos os nosos dereitos”.

Mobilizacións do 10 de Marzo, Día da Clase Obreira Galega

A Confederación Intersindical Galega (CIG) convoca mobilizacións en todas as comarcas este 10 de marzo para conmemorar o Día da Clase Obreira Galega.

-Vigo: manifestación dende o cruce da Dobrada ás 20.00 horas.

-Ferrol: ofrenda floral no monumento 10 de Marzo ás 12.00 horas e manifestación dende o local da CIG (Avenida de Esteiro) ás 20.00 horas.

-Lugo: manifestación dende o local da CIG (Ronda da Muralla) ás 20.00 horas.

-Ourense: manifestación dende a Subdelegación do Goberno ás 19.30 horas até a Praza Maior.

-Vilagarcía: concentración na Praza de Galiza ás 20.00 horas.

-Pontevedra: concentración na Praza da Peregrina ás 20.00 horas.

-Santiago: manifestación dende a Praza Roxa ás 20.00 horas.

-A Coruña: manifestación dende a fábrica de Brens (Cee) ás 19.30 horas até a Praza do Concello.

Nestes últimos anos, os efectos das reformas laborais dos diferentes gobernos do PSOE, e máis destacadamente do PP, afectaron enormemente ás nosas condicións de vida e de traballo. A pobreza hoxe está relacionada co traballo en precariedade.

Principalmente, a reforma laboral do ano 2012 do PP está causando estragos nos dereitos laborais conquistados en tantos anos de loita. A precariedade hoxe significa as facilidades no despedimento, a contratación temporal, parcial, as ETT... Todo isto permite que as empresas obriguen a traballar máis horas sen pagar e baixen ilegalmente os salarios dos convenios. En definitiva para nós, traballarmos máis e cobrarmos menos. Esta era o obxectivo da reforma laboral do PP.

Hoxe sabemos que o Estado español é o único caso no que a suma dos salarios da clase traballadora descendeu nestes 6 últimos anos preto dun 11%. Contrariamente, no resto da UE os salarios subiron por encima do 9% nos casos de Alemaña e Francia e do 4,45% en Portugal. Os salarios que perdemos, que “nos roubaron” en tan pouco tempo, pasaron a mans dos ricos (o capital), que incrementaron a súa riqueza neste mesmo período en máis do 18%.

A explotación da clase traballadora é máis brutal na actualidade con estas leis, con estas reformas, e xa non lles abonda con roubarnos os dereitos no traballo, senón que tamén queren roubarnos as nosas pensións.

Hoxe o PP non ten maioría no Parlamento; por tanto, a continuidade destas leis que atacan os nosos dereitos dependen daqueles que permiten que gobernen. O resultado final dependerá da resposta social da clase traballadora, da mobilización na rúa. Sempre na historia, gañamos os nosos dereitos coa loita.

Así foi tamén en marzo do 72, en que a clase obreira galega nunha situación represiva con centos de persoas detidas e dous traballadores mortos, Amador e Daniel, se enfrontou para gañar un futuro digno, que hoxe volve estar seriamente ameazado.

A noticia en Avantar

8 de marzo, defendemos a igualdade laboral das mulleres, tamén na sanidade

Correo-e Imprimir PDF
Partillar no Chuza!Partillar no TwitterPartillar no FacebookPartillar no TuentiPartillar no MenéamePartillar no Cabozo

mncig2pO vindeiro 8 de marzo conmemoramos o Día Internacional da Muller Traballadora. Neste 8 marzo de 2017, e en contra deses discursos falaces da igualdade xa conseguida, os estudos e datos socioeconómicos, como os recollidos no informe presentado a semana pasada pola Secretaría da Muller da CIG, continúan a demostrar que son as mulleres as que sofren en maior medida situacións de precariedade laboral, que, ademais, se viron agravadas coa crise. Hoxe en día, a consecuencia da crise, atopámonos con que tamén o colectivo masculino está a sufrir estas condicións laborais, feito que se utiliza para pretender convencernos dunha mellora na igualdade entre homes e mulleres que non é real, nin unha conquista social, nin un triunfo das poucas políticas de igualdade existentes, senón o resultado das nefastas consecuencias das reformas laborais e do resto das políticas postas en marcha para saír da crise. Esta non é a igualdade que queríamos as mulleres, a de igualarnos en precariedade.

Tamén no emprego público observamos graves discriminacións para as mulleres. Desde a CIG-Saúde vimos denunciando algunhas delas, que afectan a traballadoras da Sanidade Pública e que poñen de manifesto que en pleno século XXI, e por máis que se nos queira vender o contrario, a igualdade fica inda moi lonxe, cando nin sequera as Administracións Públicas garanten a igualdade no traballo das mulleres con respecto aos homes.

Algúns dos casos de discriminación de mulleres traballadoras que denunciamos nos últimos tempos desde a CIG-Saúde, foron:

  • Caso dunha bolseira que durante a duración da súa bolsa fixo uso do seu permiso maternal. Non foi substituída, e non puido recuperar as horas do permiso porque a bolsa tiña unha data de finalización. Por este motivo, non cumpriu os obxectivos da bolsa.
  • Aspirantes do pacto de contratacións: ademais dos numerosos casos que vimos denunciando nos que polo feito de estar embarazadas a varias mulleres non se lles ofertaron os contratos que lles correspondían polo seu número de orde na lista, cando se produce unha IT por razón de embarazo non se lles reservan os contratos de longa duración, polo que estas mulleres perden a posibilidade dun contrato estábel polo feito de seren nais, e, xa que logo, polo feito de seren mulleres.
  • Mulleres residentes MIR, EIR, PIR, FIR. A formación en residencia ten un número de horas que hai que cumprir para acadar a titulación correspondente. Cando unha muller residente goza do permiso maternal non cumpre esas horas, polo que se retrasa a data na que se formaliza o seu título porque ten que recuperar as horas que non fixo durante o permiso. Obtén o título máis tarde que o resto das persoas que empezan a residencia con ela, polo feito de ser nai.
  • O SERGAS ocultou a existencia dun novo permiso recollido no Texto refundido do EBEP para as mulleres a partir da 37 semana de embarazo. Cando despois da denuncia pública da CIG, as mulleres afectadas piden ese permiso, o SERGAS non paga a Atención Continuada durante a súa duración, polo que durante o descanso maternal, que sucede inmediatamente despois do permiso, tamén se rebaixa o salario que paga o INSS durante o permiso maternal, ao calcularse en base ao salario do mes anterior ao descanso.

Seguiremos denunciando calquera discriminación que sufra a muller polo feito de selo, tamén na Administración sanitaria. Animamos a todas as mulleres a participar nas mobilizacións previstas e nomeadamente na manifestación convocada pola CIG para o día 8 de marzo para as 10:45 horas con saída do estadio de San Lázaro, e que rematará nunha concentración ás 11h, diante da Secretaría xeral de Igualdade, en Compostela, en solidariedade con Nélida Pisco, condutora de Autobuses de Calo, que representa a meirande parte das discriminacións que sufrimos as mulleres no mundo do traballo, tras padecer durante 8 anos acoso e terrorismo patronal, coa complicidade e inacción da Xunta de Galiza, ao ser Autos de Calo unha empresa concesionaria do servizo público de transporte.

 
 
 
 
 
 
 
 

rss queremos-galego FUNDmonchoREBOIRAS

1leftarrow-icone-5226-48

 

Confederación Intersindical Galega - Federación de Saúde
Miguel F. Caaveiro, 10 - Santiago de Compostela 
Telf 981 55 28 26 - Fax 981 57 10 82
executiva@cig-saude.info - secretarianacional@cig-saude.info

2uparrow-icone-4301-48 1rightarrow-icone-9847-48

Este sitio utiliza cookies propias e de terceiros para mellorar a experiencia dos e das usuarias. Máis información sobre as cookies, o seu uso, modificación ou eliminación en política de cookies.
Se estás de acordo, preme este botón: Acepto